Manipur-a Meitei nena an buaina kal mek zelah Indigenous Tribal Leaders’ Forum (ITLF) leh Kuki-Zo tribal-te chuan Union Home Minister Amit Shah chu thihna tam tak leh chhiatna tam tak a thleng tawh chungin a thlentirtu bulpui nia an sawi, Manipur chief minister la chhan tlatah an puh.

Manipur-a tribal hnam hrang hrang hruaitute inzawm khawmna,  ITLF-in Ningania thuchhuah an siamah parliament fur thutkhawm neih meka Lok Sabha inkhawma Shah-a thu sawite an chhang let a, "A hmuh reng laia pawisawi lo tam tak an thih lai leh thla thum hnuah pawh tharum thawhna a la hmeh mit thei lo chungin home minister hian tun thlengin a bultumtu (chief architech) Manipur CM Biren Singh a la chhan tlat," an ti.

"A minister ngeite pawhin sorkar laipuiah dan leh thupek kenkawhna a hlawhchham thak tih an thlen fo tawh a. Heti chung hian sorkar laipui chuan a la bân duh lo," an ti a. Home minister chu party politics dah thaa Manipur buaina ngaihsak turin an ngen tih an sawi bawk.

ITLF-in thuchhuah an siama an tar lan dan chuan May 3 atanga Meitei nen an intihbuainaah hian Kuki-Zo tribal 130 an thi tawh a, mi 41,425 vel baihvaiin an awm tawh a ni.