India President thlanna neih zawh takah Bharatiya Janata Party (BJP) candidate Droupadi Murmu chu thlan tlin a ni a, tribal zinga India ram hruaitu lu ber dinhmun luah thei hmasa ber leh awm chhun a ni ta. Kum 64 mi Murmu hi Pratibha Patil hnua hmeichhe zinga India President ni leh thei hmasa ber a ni bawk. 

President thlannaah hian Droupadi Murmu leh opposition candidate veteran politician Yashwant Sinha te an inkhing a, rorel lai BJP candidate Murmu hian hnehna a chang ta a ni. India President ni lai Ram Nath Kovind hi July 24, 2022 hian a term a tawp tawh dawn a, a hmun ruak hi a luah zui dawn a ni. 

Odisha thingtlang khua atanga chawr chhuak Murmu hi BJP-in thlitfim tura an chhawpchhuah candidate 20 zingah a tel a, Presidential candidate atana ruat a nih thu hi TV kaltlangin a hre chauh a, amah pawhin mak a tiin a hlim hle tih a sawi chhuak. Tunah chuan India ram hruaitu lu ber dinhmun a luah dawn ta.  

Murmu hi kum 1958 khan Baidaposi, Mayurbhanj District, Odisha-ah a piang a, tribal hnam pakhat Santhal hnam an ni. Santhal hi India rama tribal hnam lian ber zinga mi an ni nghe nghe. Tun hma chuan Odisha sawrkar hnuiah clerk a thawk thin a, kum 1979-1983 inkar khan Irrigation and Energy Department-ah junior assistant hna a thawk.  

Murmu hi Jharkhand governor te pawh lo ni tawh a ni a, BJP-ah chuan mi pawimawh berte zinga mi a ni.