Prime Minister Narendra Modi chuan Inrinni khan inthlang mai tur, Tripura tlawhin hmun hniha vantlang inkhawmah hun a hmang.

Chief Minister Manik Saha, party state incharge Mahesh Sharma leh hruaitu dangten Modi-a hi an dawngsawng a ni.

Modi-a hi chhun dar 12:00-ah Ambassa, Dhalai district-ah hun hmangin tlai dar 3:00-ah Gomati-ah thu a sawi leh bawk.

Tripura BJP chuan Modi-a hian tun bakah hian February 13-a an state a tlawh leh dawn bawk niin an sawi.

BJP hian tun tum inthlanah hian bial 60 awmah bial 55 chuhin a dang panga chu an thawhpui, Indigenous People’s Front of Tripura (IPFT)-in an chuh dawn thung a. Lehlamah Left-Congress tang dunin bial 60 an chuh vek dawn.

Tripura hi February 16-a inthlang tura ruahman a ni a. Hmarchhak state dang pahnih, Meghalaya leh Nagaland-ah February 27-ah vote thlak a ni dawn bawk a. State pathuma vote tlate chu March 2-ah chhiar a ni ang.

Rorel lai, BJP hian Ningani khan an manifesto tlangzarhin party president, JP Nadda leh Chief Minister Saha ten an tlangzarh.