Aizawl, June 7, 2022 : Tualte Tomato Growers’ Co-operative Society Ltd. thar chhuah tomato quintal 162 chu Silchar, Assam-a hralh chhuah turin Deputy Chief Minister Tawnluia’n vawiin khan Horticulture Directorate kawt atangin a vai liam.

Tualte khua hi Horticulture Department in “Horticulture for Youth” tih thupui hmanga hma a lakna tipuitlingtu an ni a, “Tualte Tomato Growers’ Co-operative Society” Office Bearers’ te hi thalai kum 25-35 inkar an ni a, tomato chingtute hi kum 25 – 45 inkar mi niin an zinga 80% hi kum 35 hnuai lam an ni. Horticulture Department atangin tanpuina hrang hrang tuikhuah, tuilakna pipe, lei tha leh tomato chi, thlai venna chi hrang hrangtte an dawng thin a ni.

Kum 2021-ah “Tualte Tomato Growers’ Co-operative Society Ltd.” hming puin Society ngelnghet tak an din tan a, Society hnuaiah hian Primary Agriculture Credit Society (PACS) kalpui mek niin, tomato kung 1000 chin neite chu Association member a ziah luh an ni. Kum 2022 kal mekah hian tomato chingtu chhungkaw 210 zet Society ah share neiin an awm mek a, tuna tomato thar seng mek hi chhungkaw 120 zet an ni bawk.

Hemi puala inkhawm tawi buatsaihah khuallian Tawnluia chuan Horticulture Department in kuthnathawktute tana hma a laknaah hmasawnna chi hrang hrang kan hmu a, heng zinga a hlawkna teltute chu Tualte-a tomato chingtute hi an ni, a ti a. Tualte khua an hlawhtlinna chu khawtlang an tanrual bakah thalaite an phur a, an tui em vang a ni tih sawiin amah ngei pawhin an hlawhtlinna turin theihtawp a chhuahpui tih a sawi a ni.

Horticulture Director Dr. Elizabeth Saipari pawhin Tualte khua hian a khawtlang huapa tih tak zeta tomato chin hi an kalpui avangin hun reilote chhungin hlawhtlinna hmel an hmu a, kum hnih chhung lockdown kalpui a nih lai pawh khan phai lam tomato lak luh ngai lo a kan awm theihna chhante zinga mi an ni,a ti a. Marketing hi an Department chan a ni lo nachungin theihtawpin kan ngaihtuah pui reng a. Commerce lam hotute dawrin thlaithar zuartute nen tualchhung tomato marketing chak taka kalpui anih zel theih nan ngaihtuahna leh ruahmanna an siam reng a ni, a ti.