Aizawl: Public Health Engineering Department, Mizoram chuan tui bill an lak danah kalphung thar an hmang dawn niin hriat a ni a, a neitute hmuh lai ngeiin In-ah bill hi siamchilh nghal zel a ni dawn a, kan hman zawh thla ang zel pek nghal tur a ni tawh ang.
Tuna bill kalphhung hman lai angah hi chuan January thla ang hi March-a pek a ni thin a, tuna ruahmanna tharah hi chuan January thla bill chu February-ah pek nghal tur a ni tawh dawn a, meter reader ten meter kal an chhinchhuah rualin bill hi a neitute hnenah an pe nghal chat chat tawh dawn a ni. Tuna an khawl hman tur hi ‘Hand Hold System’ tiin a hming an vuah a, he khawl hi meter kal dan an chhinchhiahna hmunah an keng nghal zel ang a, meter kaldan a zirin bill pawh hi an siam chawpchilh nghal tawh ang.
He khawl hi tunah pawh hian meter kaldan chhinchhiah nan hman a ni tawh a, a khawl atang hian bill chu siam nghal a la ni lo thung a, a lan danah chuan he khawl hi rintlak tura ngaih a ni. Private sector bank tam takin loan ba rulte ba rulhna an chhinchhiahna khawl ang kalhmang hi a ni a, he bill thar khawl hian a hma lama an meter kal an chhinchhiah hnuhnungber leh a hman leh chin atangin an pawisa pek zat tur chu a chhut chhuak nghal ang a, bill hi a neitute hnenah an hlan zui mai

dawn a ni.
Tui bill thar chungchangah hian whattsapps leh Facebook velah thu thehdarh a awm nual tawh a, thla thar atanga hman tan tur anga sawi te pawh awmin, bill print chhinna bill form te pawh pekchhuah ang deuha thehdarh a ni. Mahse, he khawl thar hmanga bill pe semchhuak tawh anga thuthang awm hi a la awm lo niin thu dawn a ni a, meter reader thenkhatten kalphung tur hre chiang si lovin social media lamah hian an lo vawrh darh satliah ve mai niin thu kan dawng.
He kalphung thar hi hman ngei tura duan chu a niin hriat a ni a, amaherawhchu, a hman hun tur tak erawh department lam hian an la tichiang lo thung.