Aizawl June 24, 2022 : June 23, 2022-a PHE Department-in Berawtlang Multipurpose Hall-a department hnathawh thlir lètna, Work Review Meeting 2022 an neih tuma khuallian Dy. Chief Minister Tawnluia, PHE changtu-in tui bill tihpun chu thil tih àwm tih thu a sawi kha tha kan ti lo hle, PC Party chuan an ti.

Thuchhuah an siamah PC Party chuan, "India rama state hrang hrangah electric bill leh tui bil a hniam thei ang bera sawrkarin an kal chhohpui mek tawh laia Mizoram sawrkarin electric bill leh tui bill tihpun a tum hi mipui tan phurrit tak tur niin, hripui vanga mi tam tak eibar zawnna leh dinhmun a tlak hniam laia mipui phurrit belhchhahna tur lam hawia hma lakna hi kan duh lo tak meuh a ni," an ti.

PC Party chuan, Tui bill tihsan tum chhan hi sum enkawl thiam tawk loh vanga indaih lohna vang niin kan ngai tih an tarlang a, mipui dinhmun chawi kang hmasa loa mipui phurrit belhchhahna tura hma la lo turin Mizoram sawrkar an ngen thu an tarlang bawk.