Aizawl August 18, 2024 : Public Health Engineering Department hotute chuan Aizawl khawpui tui pump khawl chu tha mahse tui a nut nasat thin avangin tui pump leh sem kawngah harsatna an tawk thin tih an sawi.

PHE hotu ten ZALEN an hrilh danin tui nut leh nut loh tehna NTU (nephelometric turbidity units) ah 5 aia hniam chu mipui-ah sem tlak anih laiin tunhnaia Aizawl khawpui tui tlan ber Tlawng lui tui nut lam (NTU) chu 920 te a kai thin niin an sawi a. "Tui a nut thin em avangin enkawl/buaipui (treat) a harin a buaithlak a. Tunhnaiah chuan kan khawl tha lo ai mahin tui nu hi kan buaina bul a ni zawk a. Tuna Guwahati lama khawl kan siam tir mek hi zo pawh nise tui hi a nut zel chuan tui pump leh sem kawngah kan la buai chhunzawm zel dawn tihna a ni," an ti.

Aizawl khawpui-a tui hnianghnar pe tur chuan ni khatah tui 40 mld vel a ngai tih sawiin, "Greater Aizawl Water Supply Scheme Phase I&II hian regular taka tui a pump in ni khatah 29-30 mld vel a pump thei a. Setlak hmuna SIPMIU tui pump-na atang hian ni khatah 10 mld vel a pump thei bawk a. Ni khatah 40 mld vel pump in tui sem nuam tawk velah kan ngai a ni," an ti a. Guwahati a tui pump khawl an siam mek chu August thla chhunga an siam zo anih chuan September thla tawp emaw October thla tir lamah chuan dan pangngaiin tui sem leh theih an beisei tih an sawi a. Mahse khaw awmdanin a zir loh chuan hei pawh hi a la danglam leh thei niin an sawi bawk.

Aizawl khawpui-ah tui connection hi May thla-ah 79322, June ah 79362 leh August thla-ah connection 80298 a awm mem niin an sawi bawk.