Aizawl July 5, 2023 : Project Management Unit (PMU), PHED buatsaihin vawiin khan Vanapa Hall-ah Aizawl khawpui chhunga tuisem tihchangtlun dan tur ngaihtuahin, "Workshop on Water Management for Aizawl City - Status, Challenges & Way Forward" neih a ni. Tui semtu mi 433-in Aizawl khawpui PHE tui sem hi an enkawl.

Workshop-ah hian Er. Lalrothanga, CE, Zone-I chuan Mizoram thingtlang khua 89% ah tui connection pek an nih tawh thu a sawi a, zirna in (school) 80% leh Anganwadi 97% ah tui connection an pek tawh thu sawiin, Urban town 28 ah tui an hniang hnar a ti a. Aizawl khawpui bikah hian PHED hnuai-ah tui semtu mi 433 leh tui pumptu mi 79 an awm thu a tarlang bawk.

Workshop on Water Management for Aizawl City - Status, Challenges & Way Forward hi hun 4 ah then niin hun khatnaah Er. Lalrinzuala Ralte, SE, Aizawl WATSAN Circle hovin 'Tuisem Chungchang' zirho a ni. 

Hun hnihnaah Er. Lalhruaia, EE, Aizawl Water Distribution Division (AWDD) North hovin 'Tui Connection Pek, Pipe Fit leh Repair Chungchang' zirho a ni.

Hun thumnaah Er. Lalsanga, Sr. EE, Monitoring Cell, E-in-C hovin 'Water Meter Reading lak leh Tui Bill Chungchang zirho a ni a. Hun lina-ah Er. Lalzuimawii, EE, Aizawl Water Distribution Division (AWDD) South hovin, 'Tui Tihthianghlim, Thawktute leh Mipuite Inlaichinna Chungchang' an zirho bawk a ni. 

Session tinah hian zawhna leh chhanna hun bakah sawihona neih a ni. Workshop neih zawhfel a nih hnu hian PHED hnuaia Junior Engineer leh a chunglam zawng he workshop a telte awm hnufualin workshop atanga thil thar bawhzui ngai leh ngaihven zui ngaite an sawiho nghal a ni.