Aizawl; Deputy Chief Minister Tawnluia chuan Co-ordination Committee PHED leh CYMA buatsaih Tlawng lui lintu lui thenfai hnatlangpui chu nimin khan Vanapa Hall kawtah a vai liam a. “Kan luite tithianghlim turin pawl emaw, sawrkar emaw kan pa pek tur a ni lo a, chhungkua zawng zawng hian mawhphurhna kan nei tih hriat a ngai a ni,” a ti.

Deputy chief minister, PHE changtu ni bawk chuan Tlawng chu Zobawk dai atanga hnar nei, Cachar ramri thlenga luang lui a ni a, km 186-a thui niin district panga paltlangin, khaw 90 chuang paltlang lui a ni a, Mizoram lui pawimawh leh a bikin Aizawl leh Lunglei district-ah phei chuan rinrawl, tui in tura chawmtu tih theih hial a nih thu a sawi.

“Vawiin hnatlang pawhin a tum chu Tlawng lui fintu fui hnar lo tihfai lawka Tlawngah tui thianghlim zawk mipui tan hnianghnar taka a awm theih nan leh luitui a bawlhhlawh tam ber plastic atanga thilsiam chhuah hman tlem inzirtir a ni,” a ti. 

Tlawng fintu lui te thenfai hnatlang neih chu tih makmawh a nih thu sawiin,  "Vawiin hnatlang hi tih makmawh a ni a, CYMA nena tangkawpin hnatlang koh zel pawh a la ni ang, mihring tan mai ni lo thil nung reng rengin kan tlak chham chuan a thlakthleng tu pakhatmah awmlo a ni a, kan nunna a tana lo theihloh a kan neih ngai a nih avangin, tui thianghlim leh tui a lo tlem loh nana tui hnar humhalh leh tih bawlhhlawh loh hi kan tum tak zet zet tur a ni a, heng kawngah hian pawl emaw sawrkar kan pa pek tur a ni lo a, chhungkua zawng zawng hian mawhphurhna kan nei tih hria ila, kan tih theih tawk ti tura inpeihin hnatlang hian mipui rilru chawktho ang u," a ti a, hnatlang a kal zawng zawng te duhsakna a hlan a ni.

Thusawitu dang CYMA Vice President Lalhmachhuana chuan, vawiin hnatlang hian mizo mipuite ah rah tha chhuah se, kan chenna environment humhim kawngah CYMA chu a tlan chhe ngai dawnlo tih sawiin, vawiin hnatlang hian zoram chhungah tui thianghlim kan neih belh zelna turin kan chet chhuah a ngaih zia a tarlang a, luidung then thianghlim hnatlanga tawp mai lo a, lui dung ti bawlhlawh plastic hman tih tlem kawngah mitinin mawh kan phur a ni tih hriat a pawimawh thu an sawi a ni. General Secretary Prof Lalnuntluanga chuan district headquarter dangah pawh lui thenfai hnatlang hi neih a nih thu a sawi bawk. Tlawng Lui Fintu Lui thenfai hnatlang ah hian MLA Pu Lalrindika'n a tel pui a. Coordination Secretary Er H. Duhkima chuan a kaihruai a ni.

Vawiin hnatlang hi hmun hrang hrang - Sakhisih Lui, Kulikawn; SAI thlang, Mission Vengthlang; Tlawng Road (Reiek); Vailui Hnar, Bungkawn; Tuikual Lui Fintu, Maubawk & MINECO inkar; Tuikual Lui, Ebenezer Hospital bul hnai; Tuikual Lui (Tuithum), Lawipu; Dinthar Lui, Ebenezer Hospital bul kawr; Hnimtheilo Lui, Chawnpui/-Zonuam; Tuithum, Chawlhhmun; Sihhmui Kai ah te hnatlawng hi neih a ni.

Branch YMA hrang hrang 106 atangin mi 10 theuh hnatlang tura sawm an ni a, tun tumah hian veng chhunga chhiat tawk veng 8 an tel thei lo a, PHED thawktu mi 2500 chuang an hnatlang bawk a ni. Tlawng Lui thenfai bakah Tlawng kamah thing 250 vel phun a ni. Vawiin vek hian Serchhip leh Lunglei District-ah te hnatlang YMA Branch hrang hrang ten an nei bawk a ni. PHED leh CYMA te hi kum 10 chuang an thawk ho tawh a ni. CYMA hruaitute atanga thu dawn danin Nimin-ah hian mi 1000 vel hnatlawng an thawkchhuak a ni.