ZALEN Oct. 28, 2024; Inrinni leh nimin Pathianni khan chetsualna hrang hrang thlengah mi pathum an thi a, chung mite chu mipa, kum 22 leh kum 43 inkar mi vek an ni. 

Nimin chhun dar 1 vel khan Jerry Lalrinchhana (38) S/o. Thangzika (L) Melthum chu Tlawng Lui, Phunchawng li-ah chesualin a tlahlum a. Jerry-a hi a thiante pahnih nen Inrinni khan Tlawngah sangha man turin an kal a, niminah haw an tum a, dar 12 vel a an haw dawn hnaihah chesual palhin Jerry hi tuiah a tla a, a ruang hi a tlakna li-ah hian chawhnu dar 3 velah hmuh a ni. Nizan khan tlaivarpui niin vawiinah vui a ni.

Nimin zing khan Phillip Lalramhluna (22) S/o. Lalthanruala Khawlian khua chu accident vangin a boral bawk a.

An thiante nena an leng chu chesualin nala khurah a tla lut a, Greenwood Hospital panpui a ni a, mahse hospital thlenpui a nih hmain a boral. A ruang hi an inluah Bawngkawn chhim vengah lak a ni a, thlahna hun hman a nih hnuah Khawlian lamah lak a ni a, nizanah tlaivarpui a nih hnuin vawiin chhun dar 12:30 khan vui a ni.

Inrinni zan dar 8:00 vel khan, Serchhip leh Champhai inkara tlan, Agape Sumo, Serchhip Vengchunga Albert Vanlalhruaia ta chu, a mi phurh a dah fel tawh hnuah Serchhip chhim lam Sailiamkawn chhak, khaw chhung lam, Forest check gate bul kawng kawi, kawng thlang lamah a tlan liam a, fit 120 vel a lum. A khalhtu, amaha chuang Johny Lalthazuala (43), Serchhip IOC veng chu a hmunah boralin, police ten an kal chilh a, thil tul an tih fel hnuah, an vengah lak a ni a. Nimin chhun khan vui liam a ni.