June 29; 2022; Guwahati atanga tuialhthei phurh luhna kawngpui, Meghalaya state chhunga Lumshnong a lei a min vangte, Assam a tuilian leh rel kawng chhia vangte in, Mizoram-ah tuialhthei harsatna a la thleng chhunzawm zel a, Aizawl traffic police duty te chuan khawpui chhungah lirthei veivak a tlem phah hle tih ZALEN an hrilh. Hetihlai hian tuialhthei harsatna in a nghawng nat ber te chu commercial vehicle te nia ngaih an ni.

Tuialhthei harsatna thleng mekin mitin deuhthaw ah nghawng a neih rualin, a bikin commercial vehicle lam ah nghawng a nei na zual nia ngaih a ni a, a bikin Aizawl khawpui chhunga veivak tam ber nia ngaih, taxi (4wheeler) khalhtu thenkhat ZALEN in a biakte chuan, chhungkaw chawmna tak tak a hmang an nih avangin harsa chung chungin an la service hram hram tih an sawi a, petrol lak tur (free sale) an hmuh chhun-ah pawh litre 10 (Rs. 1,000 man) chauh an lak theih avangin petrol hnianghnar hun an nghakhlel tawh takzet tih an sawi.

Hemi chungchanga Aizawl Taxi Driver Association (ATDA) hruaitu ZALEN in a biak chuan, private vehicle (4wheeler) te nen lak theih zat inang a sawrkarin ruahmanna a lo siam tawh chungchang chu, supply department hotute hnenah an lo thlen tawh tih a sawi.

"Private motor te nen chuan kan intlan tam hleih em em a, tuna kan kal dan ang chuan, keini lam chu nitin deuhthaw petrol lak tur zawn ngaiin kan awm a, vawi khat a kan lak theih zat hi tihpun deuh theih nise tih hi kan duhthusam a ni," a ti bawk.

Tun dinhmunah Aizawl khawpui chhung-a taxi awm zawng zawng zinga hmun 3 a then a hmun 2 (taxi 2000 bawr vel) te nitin an tlan thin a, a tlangpuiin, kar 1 ah ni 4 an tlan tlangpui. Commercial vehicle dang (2wheeler taxi, city bus, maxi cab etc.) te pawhin taxi te ang tho in harsatna an tawk mek nia hriat a ni bawk.

ZALEN in mi hrang hrang a zawhkualna ah, tun dinhmunah chuan tlaivar deuhthaw a filling station (petrol pump) a lo intlar lawkte an awm nawk tawh a, freee sale awmna hmun tawh phawtah chuan englaipawhin petrol/diesel lak tum (private/commercial vehicle) lirthei intlar an tam em em reng a, traffic police te sawi danin, khawpui chhungah lirthei veivak tlem phah hle mah se, petrol free sale na hmun chhehvel ah erawh chhun lam emaw, zan lam emaw pawh nise, lirthei veivak a buai phah nasa thei hle.