Aizawl February 10, 2023: Tuikual South NGO leh Local Council te chuan Tuikual South-a UT Building hmuna AMC Multi Complex sak hawn tum chu thulh a ni. Tuikual South chuan October 14, 2022-a AMC lama duhdan an thlen tawh chhanna an hmuh loh avangin dodalna hi an lantir a, hawn a ni rih ta lo a, he ram pass hi Tuikual South Local Council hming dah ni se an ti bawk. 

Tuikual South NGO leh Local Council te hian, Garage, Market leh Dawr income atanga 50% Tuikual South Local Council a lut turin an phut a, Top floor-a Hall hi Tuikual South chanvo turin an ti bawk. AMC ten AMC Multi Complex tia a hming an vuah chu TUIKUAL SOUTH MULTIPURPOSE COMPLEX tih ni se, an ti. 

He building thar hi Management Committee awm chhung chu Tuikual South Local Council atangin member pahnih(2) tal dah ngei an ngiat a, Chowkider-ah Tuikual South mi leh sa ni ngei rawh se, tiin Garage, Market leh Dawr ah hian Ward-XII atanga dil an awm chuan Seat/Dawr awm atanga 80% hi dah ni ngei rawh se, an ti bawk.

Tuikual South khawtlang chuan heng point paruk (6) hi AMC MAYOR hnenah October 2022 khan thlen a ni, an ti a, kan ngenna hi engmah tihhlawhtlin ni lo in, building hawn anih tur thu in min deng a, chuvangin dodalna hi kalpui ta a ni, an ti.