Aizawl; Ruahtui a tlak chhunzawm zel avangin Tlawng lui in len lam a pan zel a, hemi vang hian Sairang khawtlang chu tuilian vanga harsatna tawk lo turin an inring tan a, hetihlai hian tun dinhmunah chuan harsatna lutuk tawh an la nei lo.

Sairang Branch YMA hruaitute hnen atanga ZALEN thudawn danin, Mizoram hmun hrang hrangah ruahtui tla a chawlh meuh loh avangin, Tlawng lui pawh a lian chho zel a, tun dinhmunah tui chim chin sang zelin motor kawng a tleng chho tawh a, hetihlai hian nikum lam ai chuan tui a la tlem a, nikum lam a a chim chin chu feet 20 bawr velin a la thleng lo.

Tlawnglui hnar lam, Lunglei district lamah ruahtui a tam nia a lan vangin tui a la pun belh zel nia an hriat thu thudawnna Sairang Branch YMA hruaitute chuan an sawi a, hengte vang hian Sairang khawtlang chu tuilian vanga harsatna tawk lo turin an inring tan a, vawiin lamah pawh tuilianin a tihchhiat theih tur bungraw senghawi theih ang angte an senghawi a, lawnglengte pawh hmun him lamah an thiar chhuak mek bawk.