Aizawl: Tunlai ruahsur nasa avangin Tlabung a chhungkaw 150 te chu hmun him lamah sawnchhuah an ni tawh.

Zalen palaiin Tlabung atanga thu a dawn danin ruahsur nasa avang hian Tlabung khawpui chhung bikah in 150 chu rauhsan a ni tawh a, heng mite hi Bazar shed, Fecilitation Centre (Trade & Commerce) Community Hall, Govt. Primary School I, Govt. Middle School, Modern High School leh mimal in thenkhat ahte dah an ni a, mihringte erawh thenawmte leh chhung khatte in lamah ei leh bar an inhnang fak mek thung. Ruahsur vang hian in 5 min hlauhawm a ni a, luahzui ngam a nih loh avangin an neituten an chhuahsan a, in 1 chu a tlu bawk.

Ruah a sur reng avangin khawthlangtuipui lui chu darkar tin inchis 1 velin a san belh zel niin an sawi a. Tlabung YMA te chuan Ningani zan atang khan tlaivarin chhawmdawl hna an thawk a, chhiattawhna hmun te hi an awmchilh chawt a ni. Tlabung SDO(C) Henry C.Lalrawnkima leh sawrkar mi pawimawhte pawhin awmchilhin a tul ang angin chhawmdawl hna an thawk bawk. Tui hian Tlabung playground bakah indoor stadium, sa talhna leh nul te a chim tawh a ni.

Tlabung pawhtu National Highway 302 chu hmun tam takah a ping a, Tlabung-Borapansury pawh tuilian vangin kalpawh theih a ni lo a. Power supply pawh Ningani atang khan an nei tawh lo a, an buai hle. Ruah hi a la sur chhunzawm zel avangin in chhuahsan pawh an la tam belh zel dawn niin Zalen palai chuan thu a dawng.

Tlabung bakah hian Serhuan khua a chhungkaw 120, Tippereghat-ah chhungkaw 130, Nunsury-I a chhungkaw 10, Tui chawngah chhungkaw 9 leh Silkur-a chhungkaw 10 ten an chenna in an chhuahsan tawh a ni.