June 1, 2022; Champhai khawpui tui lakna ber Tuipui lui chu pump tlak loh khawpa a nut avangin tuisem a khaihlak a, fur ruahtui tlak tam laiin, Tuipui lui hi pump tlak loh khawp a a nut kumtin thin avangin, lui dung humhalh leh vawnhim kawngah tan lak a ngai nasa hle niin Champhai PHE hotute chuan ZALEN an hrilh.

PHE, Champhai Pump Division a an hotute hnen atanga ZALEN thudawn danin, Tuipui lui chu nimin lam khan pump tlak loh khawpin a nu a, hetianga tui a nut chhan hi soil erosion leh deforestation vangte leh rambua a tam zel vang a ni. "Kan area ah chuan kawng laih in min tibuai em em lo a, mahse furah chuan a nu hrim hrim thin. Thal ah darkar 18 te ni khat ah tui kan pump theih laiin, furah chuan darkar 4-8 chauh kan pump thei, tui a nu lutuk a, kan pump thei thin lo," thudawnna chuan a ti. 

Champhai khawpui tui tlan ber Tuipui lui hi tun ang fur ruahtui tlak laiin NTU 100-200 te a kai kumtin thin a, hetihlai hian mihring ei/in a theih chin chu NTU 1 hnuai lam a ni.

Thudawnna chuan tunah hian proposal siamin, tui tihfimna sedimentation tank thar siamna tur te an proposed mek a, hei bakah hian fur lai a tui fim zawk, kawr dang atanga lakna tur te an proposed mek tih sawiin, "Ruahtui khawl kan intihhmuh a ngai a, kan lui catchment area te kan ven a ngai hle," a ti bawk.