Aizawl: Mizorama kawlphetha siam chhuahna lian ber, Tuirial Hydro Electric Project (HEP) chu kum khat chhungin kawlphetha million unit (MU) 250.63 siam chhuak thei tura duan (design) ni mah se sik leh sa inthlak (climate change) vangin a tlahniam a, MU 190 bawr vel beisei a ni a. Hmun hrang hranga leivung paih dan mumal loin Tuirial HEP-ah nghawng tha lo a nei thei dawn nia ngaih a ni.

NEEPCO engineer, Er. Lalsanglura Pachuau hnen atanga ZALEN thudawn danin ruahmanna a tira siam a nih laiin ramngaw leh tuihna a la tha a, tunah erawh engtiklai mahin MU 250 pek theih a ni tawh dawn lo tih a sawi.

“Khawvel ram dangte ang bawkin Tuirial HEP-in climate change a tuar a, tun dinhmunah MU 190 vel kan beisei a, ramngaw kan thiah nasat lutuk vang a tuihna tlem zel leh duhdah taka leivung leh hnawmhnawk kan paih thin nghawng a ni,” a ti.

“Tui nei tha pawh ni ila, leivungin harsatna a thlen thei dawn a, lui chhuat a tisang ang a, chu chuan a tha lo zawngin nghawng a nei thei dawn a ni,” a ti bawk.

Er. Lalsanglura Pachuau sawi danin, kum kal mek 2022-23 chhungin hlawhtlinna duhawm tak erawh a awm a, kum dang zawng aiin Tuirial HEP atanga kawlphetha siam chhuah a tam a, MW 30 ve ve siam chhuah theihna khawl pahnihte atangin chawhrualin ni tin kawlphetha MW 50 vel siam chhuah mek niin, power & electricity department-a SLDC-in ruahmanna siam angin kawlphetha hi siam chhuah thin a ni.

Tun dinhmunah tuipui zawl atanga teh a metre 80 bawr vel tui a tling a, metre 68-a tam tui a awmin khawl tihnun a ngamawm tawh dawn loh.  Tuirial HEP atanga kawlphetha siam chhuah zawng zawng hi Mizoram tan pek vek a ni a, inremna angin zaa 12 chu Mizoram sawrkarin a thlawnin a dawng a, a bak chu unit khat Rs.4.55-in Mizoram sawrkarin a lei.