May 26, 2022; Mizoram a kawlphetha siam chhuahna hydel project lian ber, Tuirial Hydro Eelectric Project (HEP) tuikhuah chim chin chu metre 72 a thuk a ni mek a,  mw 60 siam chhuah theihna nimahse, tui a la tam tawk loh avangin tun dinhmuna kawlphetha a siam chhuah theih zat chu mw 18 bawr vel a ni.

Tuirial HEP thawktute hnen atanga ZALEN thudawn danin, Mizoramah fur ruahtui tla mek mahse tui a la tam tawk lo a, hemi vang hian tuikhuah chim chin san theih ber metre 90.5 a nih laiin, metre 72 bawr vel tuiin a la chim chauh a, hemi vang hian tun dinhmunah chuan unit pakhat zawk atang chauhin kawlphetha siam chhuah theih a ni a, siam chhuah mek zat a tam thei rih lo.

Tuirial HEP thawktute chuan, Mizoramah June thla chho velah ruahtui a tlak that chuan July thla chho atangin tuikhuahah tui a tam tan dawn tih an sawi a. Tun dinhmunah chuan tui luanglut aiin kawlphetha siamna atana an hman chhuah a la tam zawk rih niin an sawi.

Tuirial HEP a kawlphetha siam chhuah zawng zawng hi Mizoram tan pek vek a ni a, inremna angin zaa 12 chu Mizoram sawrkarin a thlawnin a dawng a, a bak chu unit khat Rs. 4.55 velin Mizoram sawrkarin a lei.

Tuirial HEP hi 14.1.201-a hnathawh chhunzawm leh a nih hnuah NEEPCO ten project siam hna thawkin  December 16, 2017 khan PM Narendra Modi-an  a hawng a ni.