ZALEN March 24, 2026: Association for Voluntary Blood Donation (AVBD), Mizoram President C. Lalnunnema chuan hunbi neia NGO leh Kohhran member ten thisen an pek theih dan tur buaipui a tul hle tih a sawi.

C. Lalnunnema hian vawiin khan a vawi 81-na atan Civil Hospital, Aizawl-ah thisen a pe a, he hunah hian thisen pek chungchang sawiin, "Thisen pek ngai damlo an awm reng avangin thisen pek fo a ngai a. Mi pakhatin thla thum dan zelah kan pe thei a, chuvangin, thisen petute hian blood donation camp chauh-ah pek tum lovin thla 3 dan zela kan pek theuh chuan damlo te mamawh hi kan phuhruk sak theih ngei ka beisei a ni," a ti.

AVBD President chuan, "Blood Donation camp huaihawttu pawl hrang hrang NGO leh Kohhran ṭhalai te pawh an member ten 'regular' taka an pek theih dan tur buaipui hi a tul a ni," a ti..

Thisen mamawhtu damlo an pung zel a. Medical science thiamna lo sang zelin Mizoramah pawh cancer natna vei te enkawl tur an tam chho ve zel a. Chuvangin, thisen mamawhna lo pung zel hian 'regular' taka thisen petu mamawhna a siam belh zel a ni, tiin AVBD President chuan a sawi bawk.