Aizawl: Information and Public Relations Minister Lalruatkima chuan tumna tak tak nena lehkha zir turin zirlaite a fuih.

Nimin khan MZP Conference Hall-ah Pang Zirlai Pawl huaihawtin zirlai tithate chawimawina leh zirlai tharte lawmluhna hun hman a ni a. He huna khuallian I&PR Minister chuan, “Zir mawl tawp lova chhungten tha an tih avang ringawta zir ve mai kan ni em tih hi kan ngaihtuah a tha a, kan kalna tur tun atangin fumfe takin duang ila, chumi goal hlen chhuak thei tur chuan theihtawp kan chhuah tur a ni,” a ti.

Minister chuan “Kan State ringawt hi hnathawh nan tum lo ula, Sawrkar hna kher ni lo, private Company lian tak takah pawh sawrkar hnathawk aia hlawh tha an pekna pawh a awm teuh tih hriain tum neiin lehkha zir rawh u,” a ti bawk.

Khual zahawm MJA President Zonunsanga Khiangte pawhin zirlai kalkhawmte chu competitive exam lam ngaihtuah turin a ngen a. “Central service ah a tam thei ang ber inziak tling tura tan la turin ka duh che u a, hemi hi kan thei lo a nih pawhin state-ah a tam thei ang luh tum turin tan la sauh sauh ula ka duh a ni,” a ti bawk a. Phone khawih uar lo tur leh lehkha chhiar lama taima turin a fuih bawk.