Khawvel huapin hmeichhe football pawh a lar chho ve zel a, football lam hremi ten an fak lar chho ve zel bawk nen an club mipa team te lar rualin hmeichhe footballer pawh an la chho ve tep ta. Mipa football club ang maiin hmeichhe lam football club pawhin par a chhuah chho ve zel. Tun season liamta a Europe hmeichhe team tha 5 te i han en chhin teh ang. League lian 5 te atangin club hi thlan chhuah an ni. 

#5 Juventus Women

Juventus hi Italy-a hmeichhe football club hlawhtling ber pakhat an ni a, jersey dum leh var ha thin nula te hian 2021-22 season khan inelna hrang hrangah cup pathum zet an chawi. .

Game 22 an khelhah tum 19 chak record neiin tum hnih an draw a, vawi khat chiah tlawmin Serie A title a zawna a vawi 5 nan an chawi. Le Bianconere te hian Coppa Italia leh Supper Coppa Italiana trophy te an chawi tel bawk. 

UEFA Women's Champions League lamah pawh Juve nu ho hi an che tha hle a, group lamah pahnihna niin 2021 finalist Chelsea chungah an awm. UEFA  Women's Champions League -ah hian quarter-final thlengin Lyon lakah 4-3 in an tlawm thung.

#4 Chelsea Women
    2021-22 season kha Chelsea hmeichhe team tan chuan hun tha a ni. Emma Hayes-i pawl te hian an ram chhungah chuan ro an rel thei a, Europe lamah result chhuan tham an nei lo thung.

Blues te hian a zawna a vawi thum nan an ram league title leh overall tum rukna an la. Hei mai bakah hian Wembley Stadium-ah Manchester City hmeichhe ho 3-2 a hnehin FA Cup trophy a hum thei bawk.  

Europe lamah an che fuh tawk lova, 2020-21 khan Champions League final thleng mahse West London mi te hian an thleng sang hran lova, knockout stage lut phak lovin group stage-ah pathumna niin competition an mangtha. 

Samantha Kerr chu Blues best player of the season niin kum 28 mi hian competition hrang hrangah goal 29 a thun a ni. Kerr leh Hayes te chu FA WSL player leh manager of the season atan thlan an ni bawk. 

#3 VfL Wolfsburg Women

VfL Wolfsburg te hi Germany leh Europe-a hmeichhe football club tha ber pawl an ni. Anni pawh hian 2021-22 season khan cup pahnih an chawi a, Wolfsburg  nu ho hian Frauen-Bundesliga an lak bakah leh a zawna a vawi riat nan DFB Pokal chawiin record duhawm tak an siam. 

UEFA Women's Champions League tum hnih champion tawh Wolfsburg hian season liam ta khan he competition-ah hian semi-final an thlenga, final lut turin Barcelona an paltlang zo lo.

#2 Barcelona Femeni
    Barcelona Femeni te hi season thar apiangin a tha zual zel emaw tih mai turin an khel tha telh telh a, season liam ta pawh khan mel lung duhawm zet mai Catalan tan an phun leh a ni. Baulgranes hian an league title hum turin match 30 an khelhah chak vekin an champion chiang hle. Anni anga club che ropui hi hmeichhe club zingah an la awm ngai lo. League chhungin goal 156 zet an thun bawk. 

Barcelona Femeni hian an tual chhungah Super Copa de Espana leh Copa de Reina te  an chawi bawk.

#1 Olympique Lyonnais Feminin
    Lyon te hi tun lai hmeichhe football khawvelah chuan khawvel club tha ber a tih loh theih loh. An mahni ram chhung trophy leh Europe huap-ah trophy an la tam lawr lak a, Les Fenottes te hi France ram leh Europe champion an ni mek.

Olympique Lyonnais te hian Women’s Champions League champion turin Barcelona Femeni te chu 3-1 in an hneh a, an record neih sa khumin title pariat-na a la. Lyon hian season tluan khan hneh loh an tawng lova, league final-ah an chak lehin Division 1 Feminin-ah an  title 15-na an hum haw bawk.