Aizawl July 14, 2023: Vawiin khan ZPM chuan a tih thin danin party office-ah Political Session hun kan hmang a, he huna thusawitu Chief Organiser RL.Liantluanga chuan, "Kan inpumkhatna that zia hi party chhunga awmten kan hrechiang a, party dang leh pawnlam atanga min beitute dawt phuahchawp avangin kan nghing lo. Inlungrual lo anga min sawitu party-te hian min awt em em a, 'Tuna kan dinhmun hi ruling party ngei hnenah pawh hian inthleng ang u,' ti ila, rang taka inthlengpui min duh ang," a ti.

RL. Liantluanga chuan, "Mipuiin ZPM sawrkar hun an nghakhlel a, bial tinah an rawn lut mek a ni. Bial vil tur kan puan hma thatzia kan la hre zel dawn a, kan phur em em a, kum 2018 inthlanpui atang khan hnunglam kan hawikir tawh lo. He kan ram hi kan tu leh fate chenana tlakah kan siam a ngai a, kan ram, kan hnam leh kan sakhua a him a, a dam theih nan nang leh kei kan pawimawh a, Pathian leh mipuite zarah kalphung thar mipui sawrkar kan siam ngei ang," a ti.