Mizo film industry lamah hma kan sawn mawh viau. Sensiari atanga Khawnglung Run leh ZODINPUII thlengin an rawn chawr chhuah hun a in karkik viau mai. Film lamah hi chuan Mizo te hian hma kan sawn thei tak tak dawn lo ni te pawhin a lang. Mahse, hei tunah Mizo film thar pakhat a rawn chhuak leh dawn. Zoramin a buaipui em em CHIAHPUAM chungchang a ni ang a. Krismas la hmang tlem deuhte tan chuan en pawh a him lo mai thei!    "Lengpui Airport-ah kan inhmuak a, khawilai kawng nuam laiah changtunu buaipuiin Sumo kan um a, chu kawngah bawk chuan kan intibuai a, kawngsirah misual lamin Zu an lo in leh ringawt ang zel kha Mizo mipui hian kan ning tawhin ka hria, in-cho a, insual ringawt kha ho kan ti tawh a, kalphung nei a ngai," tiin CHIAHPUAM (film) director chuan a sawi, a film thar hi a chhuang hle. "Inzirna tur tam tak kan nei dawn chauh a, a film a chhuah hunah phei chuan kan la ngah zual ang," tiin inthlahrung takin a thusawi hi a tlip thung. Chiahpuam tia kan sawi mai thin, Mizo mipui tam takin kar hnih khat leka sum pung hluai beiseia sum dah lut a, sum let tam tak kan beiseina, mi tu tu te'n emaw sumdawnna leh hlawkna um-a an phet kualna, chanchin tam tak nei behchhana siam, he film-ah hian Mizorama Chiahpuam buaiin a nghawng pawisa chingpen leh pawisa thuhruk chhar avanga thian inkawmngeih takte kara chhiatna rapthlak tak thlengte kan hmu dawn a. Pawisa (sum) duh luat vanga tualthahna thlen dan kan hmu dawn bawk a ni. He film director, H. Lalthianghlima (Tama) chuan, "Mizo Film kalphung thlak danglam hi a hun tawhzia leh kal khat pet peta film siam hi Mizo mipui tam takin kan hne tawh a ni," a ti a. Film (movie) hi kar hnih khat leka chan zawh leh video editing leh sound editing zawh chi a nih lohzia sawiin, "He film atan hian voice, ambient, editing, background sound leh a kaihhnawih audio visual hrang hrangah duhthusam (fine) turin theihtawp kan chhuah a, a film hian fiah (test) a cho a ni. Movie (film) lama bung thar kai tur leh visual effect lamah pawh Mizo film siam tawh hovah te kan la hmuh ngai loh tam tak he film-ah hian hmuh tur a awm dawn a, hei hi Mizo film awm tawhte nena a danglam bikna leh chungchuanna tak chu a ni bawk a ni," a ti. LPS Cable TV lamah trailer a chhuak tawh a, veng hrang hranga chhuah a nih theih na'na a hun turte pawh an duang fel tawh a, Mizo mipui tam takin an buaipui Chiahpuam behchhana siam film CHIAHPUAM hi thlir hlan an nghakhlel. CHIAHPUAM (Action/Tragedy) tia siam film hi June ni 20 hian release a ni dawn ta a. He film hi kum khat zet buaipui a nih hnuah tunah hian tihchhuah tura hma lak mek a ni. Zirtawpni, June 20, 2014 atang hian mipui tan chhawpchhuah a ni ang. He film hi sawi tawh angin kum khat zet buaipui a ni tawh a, 2013 kum tir daih tawh atang khan he film hi buaipui a ni tawh. Shooting leh editing lam pawh a buatsaihtu lam hian an uluk hle a, chuvangin a film buaipui hun chhung pawh hi a rei phah. A film hi Mizo pumchhuak movie-ah chuan chungnung lawtlak tura ruahman a ni. A film buaipuitute leh buatsaihtute pawh experience nei tha tak an ni a, chuvangin mipui hlut hlawh hle tura beisei a ni bawk. He Film-a action leh visual effect thenkhat phei hi chu nunau leh awmnem tan phei chuan en nuam lutuk lote pawh a awm hial maithei a ni! Ruahmanna tha taka siam niin, action a tha in, aw (voice) a tha a, sound mixing a fuh thawhkhat hle bawk. Hetiang ang Mizo film hi kan la hmuh ngai loh tih ngam khawp tia chhal ngam tur a ni a, a changtu lam chet dan pawh hi naupang lam tan chuan en phal loh tih chi te pawh a ni hial ang. A film kalphungah hi chuan 'A' chuang tih tur chi a nih hmel, a category pe tu nei chiah lo mah se!