Turkey leh Syria-a lirnghing na tak avanga chhiatna thlenga nunna chan zat chu an pung zel a, tun din hmunah chuan nunna chan zat hi mi 9000 an chuang tawh tih BBC chuan a tarlang. Turkey-ah ringawt pawh nunna chan zat hi 6,957 an tling tawh a, Syria-ah mi 2,500 vel an thi tawh bawk. 

Chhanchhuah hna hi chhun zan zawmin thawh mek zel a ni a, nunna tam tak chhan him a ni tawh bawk. Hetih rual hian inkalpawhna a chhiat nasat avang leh khua a vawh avangin duh angin chhanchhuah hna kalpui chak theih a ni lo a, nunna chan pawh an pung chak hle a ni. 

Turkey President Recep Tayyip Erdogan chuan lirnghing intanna hmun (epicenter) - Kahramanmaras, Hatay leh Pazarcik te chu vawiin hian a thlawh dawn a ni.  

Russia-in a run avanga harsatna nasa tak tawk mek Ukraine chu Turkey tanpui tur hian a che chhuak a, chhanchhuah hna thawktu tur mi eng eng emaw zat an che chhuak tih Ukraine State of Emergency chuan a puang. Ukraine President Volodymyr Zelensky chuan Thawhlehni khan hemi chungchang hi sawiin, natural disaster lama mi thiam bik rescue worker 90 leh uifing 10 an tirh thu a sawi. 

Ram hrang hrangin tanpuina an thawn lut a, chhanchhuah hna thawktu pawh an pun belh zel a ni.