Turkey hmar lama lungalhthei laih chhuahna khura thil puakah mi 40 vel an thi ngei nia an hriat thu an ram interior minister chuan a sawi.

Suleyman Soylu-a hian a hmain mi 58 an chhanchhuah thu leh mi eng emaw zat an la tan bawk thu a sawi.

Zirtawpni zana thil a puah lai hian a chhungah mi 110 vel an awm nia hriat a ni a, a zahve dawn hi chu metre 300 chuanga thuka an awm lai a ni.

Chhanchhuah hna thawktute chuan zankhuaa thawkin lung chim an hai a, dam chhuak lak chhuah theih an la awm em tih an dap.

Black Sea vaukam, Amasra-a chhiatna thlengah hian video thehdarhah chuan thil lai chhuaktu chhan chhuahte chu an dum vek a, an mit chauh hriat theih khawpte pawh an awm.

Khur bulah hian chin hriat la ni ve lo thawktu chhungte leh an \hian hnai an pungkhawm bawk a, chanchin thar an ngaihven mek.

“Kan thil lai chhuaktu 58 chu himin an lo chhuak thei a. A chhungah hian 15 vel an la tang niin kan ngai a, chhanchhuah ngei tuma beih mek a ni,” tiin Soylu chuan a hmuna thuthar lakhawmtute a kawmnaah a sawi.

Thil puak hi a khur chhung metre 300 aia thuka thleng nia an hriat thu Soylu-a chuan a sawi a. “Mi 49 vel hi hlauhawm zual lai, metre 300 atanga 350 inkar vela an awm lai niin kan hria,” a ti.

Thil puak hi eng nge tih leh a chhan an la hre mai thei lo va, tual chhung prosecutor pisa chuan an chhui nghal.

Energy minister erawh chuan khur chhunga an mei chhit (firedamp) vanga puak nia an la ngaih rih thu a sawi a, hetiang hian lungalhthei khur chhungah hian methane siamin a puak duh hle.

“Engnge ni chiah tih kan ngaichang mek a ni,” a ti.

Khur chhung hmun thenkhat chim pawh a awm nual a, kangmei erawh a chhuak zui tawh lo va, boruak chhuahka pawhin a nih dan tur ang takin hna a thawk niin a sawi bawk.