February thla tira Turkey leh Syria rama lirnghinga thi chu mi 50,000 an tling ta.

Turkey-ah mi 44,218 an thi tawh niin an ram Disaster & Emergency Management Authority (AFAD) chuan Zirtawpni khan a sawi a. Syria-ah mi 5,914 an thi tawh bawk.

February 6-a Turkey chhimchhak leh Syria hmar lama nghing kha magnitude 7.7 niin a hnuah 7.6-a nain a sawi leh a. Hemi hnuah hian vawi 9,000 chuang aftershock a awm tawh bawk tih AFAD chuan a sawi.

Mahnia thawk tura inpete nen mi 2,40,000 velin Turkey-a a tuartu province 11-ah thawkin hmun thenkhat chu tlawh leh biakpawh mai theih lohte pawh an la awm a, thi hi an pun zel rin a la ni.

Tun hnai deuhvah chuan in chim leh chhe kar atanga dama lak chhuah thar an awm tawh rih lo.

Turkey bikah hian mi 5,30,000 vel chu chhiatna thlenna atanga hmun himah thiar chhuah niin sorkar chuan in 1,73,000 zet chim leh chhia a awm tih an sawi a. Mi maktaduai 1.9 chuang zet temporary shelter, khualbuk  leh vantlang hmunah an khawsa mek tih a sawi.

United Nations chuan Turkey-ah hian mi maktaduai 20 leh Syria-ah mi maktaduai 8.8 velin lirnghing hi an tuar angin a chhut a; mahse, Syria bikah hian tual chhung indona a awm reng avangin an chanchin kimchang hriat a harsa deuh.

Turkey chhim lama dam chhuak tam tak chuan an awmhmun chhuahsanin puan inah te, bungraw phurhna bawm lian chhungah leh sorkarin a pek khawsakna tur hmunah te an inbengbel rih hlawm mek.

President Recep Tayyip Erdogan chuan in chhiate chu kum khat chhunga sak that leh hman a tiam a; mahse, mi thiamte chuan rang taka indin leh a pawimawh rualin a him dan lam en uluk a tul tih an sawi hlawm.

Lirnghing an tawhah hian in tam tak chu a sak dan phung fel tawk lo vanga chim leh tawrhna thlengah an ngai a ni.