Aizawl November 18, 2022 : Mizo Hnam Run chhung inkhawma thusawitu MNF Treasurer K. Vanlalauva, Ex-Minister chuan, "Tute emaw sawichhe kher lova politics sawithiam lo te hi mipuiin rorel tlakah an ngai thei lo, thu dik leh dik lo chawhpawlha thusawi ching te avangin kohhran ram thlengin a nghawng thin,"a ti. 

Hruaitu insawichhiat tawn ching tha lo a tih thu leh politics-a inchirhthehna leh mimal nun inlipse sakin rahtha a chhuah ngai loh thu sawiin, Auva chuan, "Tumah hi  sual bik, tha duh hauhlo kan awm biklo, mitha ni a kan ngaihte hi sorkara an awm hnu hian an sual thar thut i ring lo ang u. Sorkar hian kalphung a nei a, dan avanga thiltih mai remlo a awm thin. Chuvangin, mipuite rilru mumal pu hleithei lova siamtute hi, anmahni thoin a tuar leh thin,"a ti. 

MNF Treasurer chuan, "Rorel tura political party tin ten hma kan lak naah, ro kan rel huna ram kaihhruai dan tur sawi mai ila, insawichhiat vak mai hi mipui hipna a ni lo. Engmah la ni ve lo ten hre ber leh thiam ber emaw an inti hi, an hriatloh zia pawh an inhre lo a ni," a ti. 

K. Vanlalauva hian, Returnee, party danga lo awm tawh te pawh, Hnam thuthlung vawng a, Arakan an chhuahsan dawna kan hotute thusawi hrerengin, MNF a lo haw khawm leh turin a sawm bawk a ni.