Awl sam takin an in lei fel mai dawn emaw tih hnuah Elon Musk-a'n a rilru a thlak thut a, Twitter pawh an lawm lo hle. Hetiang a nih mek lai hian Twitter chuan indawrna an kalpui thla thum chhungin US Dollar maktaduai 33 zet an hloh thu an tarlang. 

Khawvela hausa ber dinhmun luahtu Elon Musk hian Twitter lei a tum a, an thawm pawh a ring hle a nih kha. Kumin April atang khan indawrna an kalpui tan a, media lamah phei chuan an inlei fel tawh niin an tarlang hman hial a nih kha. SpaceX hotupa hian  US Dollar tluklehdingawn 44 ($tld 44) zetin Twitter a lei niin an tarlang a, kum 50 mi Elon Musk pawh hian censorship a tih tlem tur thu a sawi chhuak a nih kha. 

Hetiang a nih mek lai hian Elon Musk hian a rilru a thlak thut a, lei tumna a nei tawh lo! Hei vang hian Twitter lam pawh an lawm lo hle a, indawrna hi kaltlangpui an duh. Twitter hi Court-ah an zualko a, October thla khian Court chuan an chungthu hi a rel dawn a ni. 

An boruak a len lai a ni bawka Twitter hmangtu pawh nitin mi maktaduai 237 an awm chho a, mahse sum an hloh thung. April atanga June inkar khan $mtd 33 zet an hloh niin an tarlang. Kum 2021 khan Twitter revenue hi $tld 5 a ni a, mahse thla 12 liam ta khan 45% in a tlahniam a ni. An sum hloh hi $mtd 200 chuang zet a ni a, an indawrna hlawhtling ta lo hi Twitter hian an tuar hle a ni.