July 5, 2023; BJP leh a sangawizawnpuite lian zel tur leh Uniform Civil Code (UCC) parliament a pass an tum mek khauh tak leh lungrual taka dodal puiah congress party chuan mi zawng zawng an sawm.

Vawiin a thuthar thehdarhtute a kawmna ah congress thupungtu Ronald Sapa Tlau Ex MP chuan, mi thenkhatin, 'parliament in UCC hi pass mah se, Mizoram Legislative Assembly in a pawm ve kher loh chuan Mizoramah hman theih a ni lo ang', ti a sawi an awm mek tih tarlangin, "Thudik tluantling zawk chu, UCC dan hi BJP hoin Parliament ah an pass vaih chuan, Kashmir Special Status, tia an chhuan em em pawh, kum 2019 a BJP sawrkarin Kashmir State a thiah rual rualin an Special Status kha a bo nghal dan kan hmuh tawh atang khan, Zofate sakhua leh hnam nih phung humhim tur chuan Mizo mipuite himna awmchhun, UCC Parliament a pass an tum hi mipui nawlpuiin thothil ang thapa a tawp thlenga kan lo do zel hi tihmakmawh a ni," a ti.

UCC chu India ram inpumkhatna tichhe theitu tur leh hnam tenau leh sakhaw te zawkte rahbehna leh inchimralna hmanraw hlauhawm tak anih dawn avangin a tawp thlenga dodal tlat a ngai tih chu congress party ngaihdan nghet tak a ni tih Ronald Sapa Tlau chuan sawi bawkin, "Hemi chungchang India mipuiin an ngaihdan Law Commission-a thlen theih hun (june ni 14 atanga July ni 30) chhung ngeia Law Commission-ah thlen tura MKHC in thahnem ngai taka party tinte a ngen ang ngeiin, congress party president Pu Lalsawta chuan a remchan veleh kan party doldalna thu a thlen dawn a ni," a ti bawk.