Aizawl July 17, 2023 : Vawiin khan Aizawl khawpui chhunga Hall hrang hrang pathum (3) - Dawrpui Multipurpose Hall, Electric Veng YMA Hall leh Vaivakawn YMA Hall ah te UD&PA Department a thawktute chun In-sak tanpuina dawng turte hmalak dan tur hrilhfiahna hun (Sensitization) an hmang.

PMAY-HFA (Urban) Mission hnuai ah hian Mizoram pum ah mirethei Insakna dawng tur (beneficiaries) chhungkua 37450 an awm a, Insak tanpuina Cheng nuai 1.5  theuh Instalment thum (3) a pek tur an ni a. Chhungkua 21731 ten 1st Instalment Rs. 60,000/- theuh an dawng tawh a, la dawnglo chhungkua 15719 te hi August, 2023 ral hma in 1st Instalment Rs. 60,000/- theuh dawn tir hman turin hma lak mek a ni. Kum 2024 ral hma-in heng te Insak tanpuina an dawn tur ang pek kim vek hman tura hmalak a ni.

PMAY –Urban hnuai a Insak tanpuina dawng tur beneficiaries te hi, Insak tangpuina (Fund) pek an nih hmain, UD&PA Department chuan inhrilfiahna hun (Sensitisation Programe) a nei thin a. Aizawl khawpui chhunga kohkhawm te hi an vaiin mi 1165 an ni. Inhrilfiahna hun hman zawh hian a dawngtu tur te hian an pawisa dawn te In sak nan ngei hmang tura intiamkamna an ziah hnuah fund hi an dawng chauh thin a ni. He Mission hi bultantan a nih tirh atangin 1st Instalment dawng thar turte a piang hi inhrilhfiahna hun UD&PA Department in a hmanpui zel thin a ni.