UEFA chuan Champions League team of the season-a an player thlan chhuahah finalist team hnih atangin player pali ve ve an thlang a, player dang pathum te chu PSG, Chelsea leh Manchester City te an ni thung. An zingah hian thawm nei lian leh Ballon d'Or award dawn beiseiawm khawpa chetha player pahnih Sadio Mane leh Mohamed Salah te erawh an lang phak ve lo. 

Final zana chetha em em Sadio Mane leh Mohamed Salah te goal shot vawi duailo dan saktu Thibaut Courtois chu goalkeeper-ah thlan chhuah a ni a, a ni hi final zan chauh nilo hun hmasa lamah pawh a chetha fo thin vangin Belgian hian a phu ve rengah a ngaih theih. 

Tlar hnung lam hi Liverpool lamin a awp hneh hle a, tlar hnung player pali zinga pathum chu Reds player an ni. An zingah Chelsea player Antonio Rudiger a inzep ve phak hram. Andrew Robertson chu left-back-ah thlan a ni a, Virgil Van Dijk leh Rudiger te pahnih a laiah dingin Trent Alexander-Arnold chu vei lamah dah a ni thung. Final zanah Vinicius Junior-a ten sutlang thei mah se Real Madrid leh club dang defence te ai chuan rin an la hlawh thei tho hi Liverpool lam tantute tan chuan a thlamuan thlak viauin a rinawm. 

Midfield lamah hian Luka Modric hi semi-final leh final-ah chetha lo mah se Paris Saint Germain leh Chelsea an hmachhawn tum, round of 16 leh quarter-final-ah te a chetha em a, hei vanga thlang hi an nih a rinawm. Ani bakah hian inhliam vanga chawl, final zana rawn let chauh Fabinho thlan a ni a, Premier League Champion City lam atanga lang awmchhun an captain Kevin De Bruyne pawh thlan zingah a tel. A ni hian semi-final an thlen theihna turin Citizen tan a thawh hlawk hle a ni. 

A hmatawng lamah hian Salah emaw Mane an lang phak lo hian Liverpool lam chu a thawng ve deuhin a rinawm. Salah tlanna thin mual ding lama ding turin UEFA lam chuan Kylian Mbappe an thlang zawk a, a laiah goal 15 zet thuntu leh UCL Player of the Season Benzema dah niin vei lam sirah Vinicius Junior an thlang thung.