UFC fighter tha ho hi chuan octagon an luh apangin figure nga atang ruk inkar vel hi an hlawh thin tlang pui. Chutihrual chuan fighter tha leh boruak siam thiam bik erawh chuan fight lian tak tak buatsaihin pawisa pawh an rut tam thin hle thung.   

3. Andrei Arlovski: $10,631,000
Andrei Arlovski hi Belarus lam chhuak niin UFC fighter rothap tak a ni a, MMA fighter tawn hriat ngah lo tak Andrei Arlovski hi UFC fighter sum hlawh chhuak tam pathumna a ni phak. Tam tak chuan a fight pawh kan la hmu lo hial maithei. A la insual tam lo chung hian, a insual chhunah a hlawh tha thei hle a ni.

Kum 2009 khan Belarusian heavyweight hian Fedor Emelianenko a hmachhawn tumin $1.5 million zet a hlawh chhuak hem mai. Arlovski hian a insualna atangin $10-million chuang a hlawh chhuah tawh a ni.

Kum 43 mi hian a insual tawp lam bout 10-ah khan bout tinah $300,000 vel hlawh chhuak ang a ni a, a pum puiah $10,631,000 a hnek chhuak tawh a ni.

2. Khabib Nurmagomedov: $14,770,000
Russian superstar hi pawisa lalut tam ber pahnihna a ni phak a, a insual thiam zia hmu thin UFC fans tan chuan a pawmawm khawp ang.

UFC fighter tha ber pakhat Khabib Nurmagomedov hian record a nei tha hle a, MMA a khelh chhungin Ogtagon tum 29 lutin a chak vek thei a ni. Kum 33 mi sum hlawh chhuah 92.2% deuh thaw hi a fight hnuhnung pathum atanga a hmuhchhuah an ni. UFC 229-a Conor McGregor nen an insual tum khan a hlawh chhuak hnem hem hem hle a ni.

1. Conor McGregor: $25,104,000
UFC golden boy hi he list-a pakhatna dinhmun hauhtu niin UFC fighter zinga pawisa hnek chhuak tam ber a ni. Kum 33 mi hian octagon chhunga a inhnek atangin $20 million a hlawh chhuak a, PPV atangin sum eng emaw zat a hui lut bawk. 

Irish fighter hian a inhnekna atanga a hlawh bakah Reebok, Burger King leh Beats te sponsor-na atangin a lalut nual a, McGregor-a'n UFC atanga a hlawh chuah chu $25,104,000 a ni.