Aizawl: Central sawrkar Secretary, Department of Health and Family Welfare leh Joint Secretary (HE), MHRD te thuchhuah zulzuiin Novel Coronavirus (Covid-16) chungchangah University Grants Commission (UGC) chuan thuchhuah a siam a, an hnuaia University leh College te chu an hmalak dan tur thlengin a hriattir.

UGC chuan an hnuaia zirna in te chu an campus chhungah punkhawn khap turin a ti a, Covid-19 in a tihbuai ram tlawh zirlai leh hetiang natna kai nena ni 28 kalta chhunga inhnimhnai te chu ni 14 tal home quarantined turin a hriattir. Zirna In thuneitute chu hetiang natna kaih-hnawih natna, khawsik, khuh leh thawk lama harsatna neite chu ngaihven bik a, test pawh neihpui turin a ti.

Doctor-ten an enkawl tawh chu campus zawm mai lo turin an ti bawk a, thawktu leh zirlai te kut leh thawkna lamah himna tur lam ngaihtuah tha turin a ti - Kut hi a bik taka ngaihpawimawh a ni a, sahbawn leh tui hmanga fai taka sil tur a nih mai bakah zu (alcohol) tel hand sanitizer chu fai taka kut sil a nih hnuah hnawih tur chhawpchhuak turin a ti bawk.

An duh ang chuan zirlaite chu an hmai khuh tlat turin an ngen a, mi an khuh dawn emaw, an hahchhiau dawn reng rengin an ka hup turin tih an ni a, hemi hnu hian an mit, an hnar leh ka an khawih tur a ni lo a, hetiang kaihhnawiha hman tissue/rawmawl emaw hi chu hman nawn tawh lo turin an ti.

Mihringten loh theih lova kan hman, kawngkhar pawhna, switch, dawhkan, dawm ban te chu natna hrik laka fihlim tura damdawi hmanga enkawl tur a ni. Hmun tinah (spot) zu tel hand cleaner/sterilizer chu campus chhungah dah tura tih an ni tel bawk.