August 31, 2023; Mizote hi tun hma atangin ranvulh uar hnam tia sawi theih kan ni. Chumi nghawng chu ngei ni, tunhnai chho ah Ui chungchang vangin thu inchuh lian tak a awm chho mek.

ZALEN in a chhinchhiah chin ah tunkar Thawhtanni atanga vawiin September ni 2, Inrinni thleng hian Aizawl Civil Hospital Casualty ah Ui seh case 20 zet a awm.

Hei hi Ui vulhtute kan la inthlahdah tih entirtu pakhat a tling ang. Heng bakah hian a bikin Aizawl leh Mizoram khawpui dangten tun thleng a an la buaipui chu khawlaia Ui chhuak chungchang hi a la ni.

Hemi chungchang hian vengchhung titi a luah ve deuh reng a, khawlai a Ui ek hmuh tur awm thin pawh rikpui hlut veng tam tak tun thlengin an la awm.

Hetih mek lai hian khawvel changkanna ang zelin, Ui vulh kawng a hmasawnna leh dan anga humhalh duh pawh an pung chho zel bawk a, tunhnai chho ah phei chuan sawrkar department hrang hrangte chu an thil tihkhawmna ah Uisa siam lo tura ngen an ni a, Ui enkawlna hmun pakhat phei chuan Aizawl Uisa Zuar Association te hnenah an Uisa zawrh bansan a, an dawr signboard te pawh la thla turin an ngen hial bawk.

Hetihlai hian ZALEN in a biak Uisa zuarte chuan tun thlengin an eizawnna ah harsatna tawh an la nei lo tih an sawi a, an inhralh danah pawh danglam a awm lo niin an sawi.