Mizote hi kan pi leh pu atanga ui vulh thin kan ni a, mahse hmanlai chuan sumhmun leh khawlai remchang laiah te an riak thin a. Mahse, tunah erawh chuan kan ui vulh te chuan kan chhungkua ah hmun lailum changin ei leh in mai bakah riah-na leh thil dangah te duhsakna an dawng sang ta hle.

Kan ui vulh te hi kan duat a, mahse a enkawl leh khuahkhirh kawngah erawh chuan tanlak kan ngai hle tih a lang a. Ni tin zan tina damdawi in pantu eng emaw zat chu Ui seh vang a ni a, hei mai bakah khawlai leh mi inah te an zun leh ek an thiar thin avangin ngaimawhtu pawh an tam hle bawk.

Hetiang hi anih mek laiin ui sa chu Mizote sa duh ber zinga mi ani bawk a, engemaw thianho leh pawl thiltihkhawm nikhua ah pawh uisa chu hmatheh leh lamrik rin ber zinga mi a ni.

­­Hei mai ni lovin chhungkaw thenkhat chuan Pathianni sa ah te an hmang hial a, chutih laiin ten em em leh thinhrik pawh mi engemaw zat an awm bawk. Ui sa hi hmarchhak state ah chuan Mizoram bakah Manipur leh Nagaland a hnam thenkhat te hian an ei niin a lang a, India ram hmun tam zawkah chuan an ei chu sawi loh an ten hle thung.

Aizawl khawpui ah hian ui sa zuar dawr lian hi 5/6 vel a awm a, anni bakah hian mi puahsa lo sat chhawng veleh engemaw zat an awm bawk. Aizawl-a ui sa zuar pakhat chuan chawhrualin kar khatah ui 120 atanga 150 vel an hralh zo thin niin Zalen a hrilh a. Hei hi hunpui engemaw ah chuan an pel thin tih a sawi bawk.

Ui chu dan tlangpuiin Tlabung, Kanhmun leh Vairengte atangin an chawlut thin niin a sawi a, an duhkhawp an hmuhloh avangin a chang chuan hralh tur pawh an nei lo hial thin niin a sawi bawk.

Hmasawnna a kal chho zel a, ei leh in pawh kan ulukin thianghlimna kawngah pawh kan harhthar nasa hle a. Hetih lai hian Mizote sa duh ber zinga mi ui sa hi a thianghlim leh thianghlim loh kawngah tun aia tanlak a ngai hle mai. Zalen zawhna chhangin AH & Vety Department a thawk pakhat chuan ui sa chu a thianghlim leh thianghlim loh an enfiah ngai lo niin a sawi. Vety mithiam ten an endik lo anih chuan eng ui nge an talh a, khawia mi nge, a hrisel em tih pawh tuma hriat a ni ta lo hi a tha lo leh fel lo lai tak chu a ni ta a ni.

Pa pakhat chuan, “Mizote hian ui sa hi kan ei nasaa, khap ngawt theih pawh a ni lo a. Kan dawr bulah hian ui sa dawr a awm a, a lun em em reng bakah a chang phei chuan a leitur hian hming an ziak hial a. Tuna a pawimawh ta ber nia ka hriat chu sa thianghlim kan ei theih nan sawrkar hian tan la se ka duh hle a ni,” tiin Zalen palai a hrilh. hetih lai hian pa pakhat chuan ui sa chu Mizo ten tui kan tih ai mahin a eikhawm boruak vel nuam kan tih avanga ei nasa kan nia a hriat thu a sawi ve thung.