Aizawl January 12, 2024: Vawiin khan Chief Minister Lalduhoma chuan United Kingdom a Mizo Nurse te hna hmuhsak thin Mizoram OET Coaching Hub (MOCH), Charkos Global peng pakhat neitu Lalrinawmi Fanai leh Mary Zothanchami te a kawm a, UK-a Nurse tam zawk thawn theih nan inpuihtawn dan tur an sawiho.

MOCH te hian an insawi danin Charkos Global UK te nena tang dunin kum khat leh a chanve Mizoram-ah hna an thawk tawh a. UK-a Nurse hnathawk duh mi 19 ten an training buatsaih an pass tawh a, an zinga 14 ten UK-ah registered nurse hna thawk mek a, thla khatah cheng nuaih thum vel an hlawh phak vek a ni.

Chief Minister chuan tunhnaia British Deputy High Commissioner in charge of East India Dr. Andrew Flemming nena an inkawmnaah Mizo Nurse tam zawkte UK a thawn an rel a, chak taka bawhzui an remti dun bawk tih a sawi. Hemi atana hnathawktu an nih avangin a theih anga tanpui an that a rinawma thu a lo hrilh. An thil dil chunchang hi Mizoram Youth Commission chairman thar tur phone in a hrilh nghal a, an hmalaknate Mizo Nurse hna zawnglaiten hre zau thei se tha a tih thu a sawi bawk.

MOCH te hian UK-a Nurse hna thawk tur tan inbuatsaihna an neihpui thin a, Mizoram Youth Commission nena inremna siamin an hnena nurse training-in hna a hmuh chuan, sponsor nan cheng sing nga an pe thin a. Mahse he an sponsorship hi an tihtawp tak avangin harsatna an tawk tih Chief Minister hnenah hian an thlen a, chhunzawm leh turin an dil a ni.