United Kingdom (UK) prime minister Boris Johnson chu a cabinet minister ten a nihna atanga bang turin an nawr mek. A kaihhruai sawrkara finance minister leh health minister te chuan banna an thehlut awh a, minister dang panga ten banna an theh lut leh tawh bawk. 

BBC-in a tarlan dan chuan a cabinet minister te chuan Boris Johnson hi prime minister a nihna atanga bang turin na takin an nawr mek a, a dinhmun pawh a tha lo hle niin an tarlang. Hetih lai hian amah chuan ban mai a tum lo thung a, UK politics a buaichho leh mek. Bang tura nawrtute zingah hian Chief Whip Chris Heaton-Harris leh Welsh Secretary Simon Hart te an tel a, Northern Ireland Secretary Brandon Lewis leh Transport Secretary Grant Shapps te pawh a phusa zingah hian an tel. 

Thawhlehni khan minister pahnih chuan banna an thehlut a, MP pakhat a bang tawh bawk. Finance Minister Rishi Sunak leh Health Minister Sajid Javid te chuan banna hi an thehlut a, vawiin khan minister dang panga ten banna an thehlut leh bawk. Sawrkar a kaihhruai danah lungawi lo an tam avangin Boris Johnson hi bang tura nawrna a nasa zual hle a ni. Kum 58 mi Boris Johnson hian thla hmasa mai khan parliament-ah fiahna a lo paltlang tawh a, mahse a laka hel tawk an la awm reng a ni.