Ukrainian president chuan Ukrainian chhungkaw maktaduai ruk chuangin kar liam ta chhunga missile-a beihna an tawh hnuah power an nei lo mek tih a sawi.

“Zanin region tam zawk leh Kyiv-ah pawh power nei lo kan la awm teuh,” tiin Volodymyr Zelensky hian Zirtawpni zana thu a sawinaah a sawi.

Nilainia nei lo zat zahve erawh chuan an tlem tawh tih a sawi a; mahse, maktaduai tam tak chu thlasik thleng mekah êng, tui leh intihlumna nei lovin an awm.

Video-a thuchah a sawiah President Zelensky chuan beihnaah an tawhah hian an khawpui leh a chhehvel chu a tuar na ber an nih thu a sawi a. Khawpuia cheng tam tak chuan ‘darkar 20 atanga 30 inkar vel’ power an hmu tawh lo niin a sawi.

Russian-ten kar liam taa an beihna hi chhim lama Odesa, khawthlang lama Lviv leh ram lailia Vinnytsia leh Dnipropetrovsk region ten an tuar nasa niin a sawi bawk.

President Zelensky chuan energy ren turin mipuite a ngen nghal a, “Power awm loh a tawp khan buaina a fel ta tihna a ni lo. Khawngaihin electricity in neih pawhin electrical appliance chak tak takte hmang vek kher lo turin ka ngen cheu a ni,” a ti.

“Tun thlasik kan tawrh mek hi mi tinte hriat reng tur thlasik a ni dawn,” a ti.

Prime Minister Denys Shmyhal chuan beihna nasa tak tawk mah se an rama infrastructure pawimawh zual chu an tun din leh tawh thu a sawi a; heng zingah hian tui lakna, heat generation plant, damdawi in leh emergency service lam thilte a tel.

Mi nawlpui erawh chuan region tinah power awm loh thut thut erawh an la nei tih a sawi bawk.

Russia-in Ukrainian infrastructure an bei hun hi vur tlak leh tui khal theihna khawp khaw vawt intan mek a nih avangin hriselna lama buaina nasa tak a thlen palh a hlauhthawnawm hle.

Ukraine leh a tan rualpui khawthlang ramte chuan Russia-in civil mite hmun pawimawh an beih chu war crime a nih thu an sawi a, Moscow erawh chuan chutianga an chet loh thu an sawi thung.

Zirtawpni khan Kherson regional governor chuan damdawi ina damlo enkawl laite chu ‘Russia-in laipui an kah nasat avangin’ hmun dangah an sawn tih a sawi.

Khawchhak lam khawpui, tun hnai lawka Ukrainian sipaiten Russia kut atanga an lak letah hian city council thuneitute chuan kar liam ta chhung khan mi 15 an thi tih an sawi.

Russian-ten boruak atanga an kah mek lai hian UN hnuaia nuclear agency chuan Ukraine huam chhunga nuclear plant pathum chu grid-ah an thlunzawm leh twh tih an sawi.

Nuclear plant dang, Russian-te awp lai, Zaporizhzhia-a mi pawh Ningani atang khan a nung leh tawh bawk.