Ukraine khawpui pahnihna, Kharkiv chu Russia-in an ram hmun hrang hrang kapa an energy station-te a beih leh hnuah power nei lovin darkar tam tak an awm phah leh.

Tual chhung thuneitute chuan Russian sipaiten missile 76 leh drone hmanga Zirtawpnia an kahnaah hian power hmunpui pakua lai a fuh tih an sawi.

Kharkiv mayor chuan ‘chhiatna nasa tak’ a thleng tih a sawi a; mahse, zan lamah chuan khawpuia cheng zinga 55% chuan electric an nei leh hman.

Mi cheng pakhat, Anastaisa chuan an khawpui hi Zirtawpni zing atanga kah tan a nih thu BBC a hrilh.

“Minute reilo te chhungin light chu a phe nghal zawk zawk a ni,” tiin thla hnih mi nau pawm chuan a sawi a. “Second 10 hnu velahpower a awm lo nghal a. Pumping station-in hna a thawh theih bawk si loh avangin tui a awm bawk si lo va, tui leh power nei lo khawpui kan ni,” a ti.

Zan lamah erawh Kharkiv sorkara hotu, Oleg Synegubov chuan electric chu 55%-in an neih leh tawh thu leh region hmarchhaka cheng bik zinga 85% phei chuan an nei leh tawh tih a sawi a. Zan laiah chuan an en kim a beisei tih a sawi bawk.

Hetih lai hian Ukraine-a power grid operator, Ukrenergo chuan power hmun chhiate siam tha leh vek tur chuan hun a duh dawn tih an sawi.

Ukrenergo hian Zirtawpnia beihna avang hian an pek chhuah theih zahve vel chauh an pek theih phah tih an sawi a. Hmun pawimawh zual - damdawi in, tui pekna, intihlumna leh bawlhhlawh sawngbawlna lama pek tur an ngaih pawimawh hmasak thu an sawi bawk.

Mandaus kaihhnawih thil thleng

Zirtawpnia Russian chet lehnaah hian mi pathum an thi a. Thi zinga pahnih hi Kryvyi Rih-a mihring chenna lai kah fuhnaa mite niin mi 13-in hliam an tuar bawk a. Kherson khawpuiah mi pakhat a thi bawk a. Khawpui ber, Kyiv-ah erawh pawi lian a thleng lo thung.

Ukraine ram pumah Zirtawpni khan air raid silen tihrik a ni a, Commander-in-Chief General Valeriy Zaluzhny chuan an air defence system hmangin missile 76 zinga 60 chu an lo kah thlak thu a sawi.

Kyiv khawpui thuneitute chuan khawpui bik hi missile 40 chuanga kah a nih thu leh hei hi February 24-a Russia-in a rûn tan hnua tum khata beihna an tawh nasat ber zinga mi a tlin thu a sawi a. Missile 37 chu an lo kah thlak thu a sawi bawk.

Ukraine chuan tun hnaia Russia-in an engerny hmunpuite a bei vak chu ‘war crime’ tia sawiin civil mite hmunhma beih a ni tih a sawi a. Thlasik an tawn mek chu hmanruaah an hmang nia puhin khaw vawt hnuaia intihlumna tur power an tlakchhak theih nana tih niin a sawi.