Aizawl September 13, 2022 : Ni thum cham tura Mizoram vawiina rawn thleng Union Minister of State for Rural Development, Consumer Affairs, Food & Public Distribution, Sadhvi Niranjan Jyoti chuan vawiin chawhnu khan hmeichhia hlirin dawr an nghahna Vaivakawn chawhmeh bazar a tlawh a, chawhmeh zuartute nen inkawmna an nei.

Lengpui atangin Vaivakawn bazar hi panpui nghal a ni a, bazara thlai thar zuarte tlawhin a kawm a, he bazar chanchin a lo hriat tawh thu leh nuho hlirin dawr an nghak tih a hriatin a tlawh chak hle tih a sawi. Mizoram chu a thlen chinah nuam a tih thu leh ram mawi tak a ni tih sawiin amah pawh thingtlanga pianga seilian, thingtlangnu ve mai a nih thu sawiin, "VIP angah pawh ka inngai lova, in zingah hian ka mikhual lo a ni," a ti 

Union minister hian, Prime Minister Narendra Modi-a'n India hmarchhak a ngaih pawimawh thu sawiin ani thuchhuak anga rawn kal a nih thu a sawi a, Consumer ten harsatna an tawh ang te a hnena an thlen chuan sutkiansak dan kawng a zawnpui tur thu a sawi bawk a ni

Bazar enkawltuten harsatna an thlen Vaivakawn bazar building sak thatsak tura an ngenna chu rural development ministry chang a nih thu le rural area-a awm chu ni se thupek ka chhuah nghal thei a, urban area a awm a nih avangin project proposal te siam a nih chuan theihtawp chhuaha a lo bawhzuisak tur thu a sawi thung a ni.

Sadhvi hian vawiin chhun khan Lengpui Airport  a rawn rawn thleng a, Rural Development Minister Lalruatkima'n a lo hmuak a, Chief Minister Zoramthanga Delhi zin tur nen Lengpuiah hian an inkawm nghal bawk a ni. 

Union MoS hi zaninah Mizoram Larsap Dr. Hari Babu Kambhampati nen Raj Bhavan-ah inkawmin Raj Bhavan-ah hian a riak nghal dawn a, naktuk hian Mizorama 'Aspirational District' kan neih chhun Mamit District a tlawh ang.