Aizawl July 12, 2023: Union Minister of State for Agriculture & Farmers' Welfare Shobha Karandlaje chuan vawiin khan College of Veterinary Sciences & Animal Husbandry, Selesih-ah Bio Safety Level-II Laboratory (BSL-II) leh Mushroom Spawn (Seed) Production Unit a hawng a, zirlaite chu kuthnathawktute thleng phak zitchhuak turin a chah.

Hawnna inkhawmah Union Minister of State Shobha Karandlaje chuan Mizoram sawrkarin a lo mikhual danah lawmawm a ti. Prime Minister Narendra Modi a'n loneitute/kuthnathawktute a ngaih pawimawh ber an nih thu sawiin an hmasawnna tur scheme tam tak ruahman a nih thu a sawi a. Sawrkar hmalakna avangin khawvelah thlai chi hrang hrang engemawzat leh bawnghnute thawnchhuak tam ber a ni a. India ram chhunga chengte ei leh bar hnianghnar taka a intodelh thei lo thin hi a vei em em a ni a ti a. 

Vety College Zirlaite chu an zirlaiah taima taka thawk tura chahin an thiamna zirchhuahte chuan kuthnathawktute hnen a thlen loh a, kuthnathawktuten hmasawnna atan an hman loh chuan awmzia a awm dawn lo tih sawiin, kuthnathawktute hnen thleng pha ngei thiamna leh inpekna zirchhuak turin a chah a ni.

Union Minister of State hian College of Veterinary Sciences & Animal Husbandry-a KVK ten exhibition an buatsaih a en bakah PM Kishan Scheme hnuaia kuthnathawktute nen an inkawm a, loneitute harsatna tawh te a ngaihthlaksak a, a tul anga hmalak a nih tur thu in a chhang a ni. Union MoS hian Mizorama loneitute tan hmunhma zau tak neih a har avangin thlai leh thei rah an chin bakah ran vulh tel thin ni se awmzia a neih a beisei thu a sawi bawk a ni.