Aizawl December 5, 2022: Congress Thalai chuan, Mizoram tlawhtu Union Minister of State for Minority Affairs John Barla-a'n, sawrkar laipuiin sum a pek te tichingpen thinah Mizoram sawrkar puh a, Kristian ram inti ngam state-a thil thleng atan zahthlak a tih thu a sawi chu Mizoram Pradesh Youth Congress Committee chuan zahthlak an tih thu leh hnam anga mualphona tawp tiin, MNF chu Governor hnenah banna thehlut ngei se an duh tih thuchhuah an siamah an tarlang.

MPYCC chuan, "Union Minister of State John Barla sawi danin Ministry of Minority Affairs atang ringawt pawhin infiamna, zirna, hostel sakna tur leh market sakna atan te cheng vaibelchhe 1000 chuang Mizoram sawrkar hnenah pek a ni tawh a; mahse sum hman dan (utilisation certificate) an dilin, Mizoram sawrkarin pek tur a nei lo hi zahthlak kan ti em em a. Mizoram sum bawm enkawl tlakah Pu Zoramthanga kaihhruai MNF sawrkar hi kan ngai lova. Ram hmasawnna daltu leh Mizoram tithuanawptu bakah hnam dang leh Central thuneitute hmaa hnam timualphotu an ni," an ti.