Aizawl: UPC pawl pahnihte boruak kal zelah High court lam thutlukna la pawm thei lo Mizoram UPC te chuan Supreme Court lamah an zualko a, May 10 khan Supreme court-ah an zualkona thu hi an thlen a ni.

Tunah hian Special Leave Petition an nghak mekin an thu thlen hi ngaihtuah mek nia thudawn a ni a. Court lam hian inremna nei turin an tih leh phawt a rin thu UPC North East India General Superintendent Rev. Lalmalsawma Sailo chuan ZALEN a hrilh.

Hetih lai hian anni lam hi chuan High Court thutlukna chu an dinna tur a nih thu a sawi. August 30 hian an chungchang hi Supreme Court chuan a ngaihtuah dawn a, a pawm dawn leh dawn loh he hunah hian tihchian a ni ang.

UPC pawl pahnih te inkar buaina hi hun rei tak thutlukna awm lova kalpui a nih hnuah, 2011 khan Additional District session judge chuan judgement tichhuakin an bungrua leh hmunhmate a insemtir a, hei hi UPC NEI lam chuan pawm thei lovin 2015 khan High Court-ah an thlen a, High Court Judge SC Jamir chuan thutlukna hmasa chu thiatin UPC bungrua zawng zawng hi UPC NEI chan tur tiin thutlukna hi a siam ta zawk a ni.

UPC NEI lam hian an kohhran bungruate chu UPC constitution-in kohhran atanga chhuakte bungrua pakhat mah an chuh thei lo vang a tih, chu tan chhanah an hmanga a, kohhran registration upa zawk an nih miau avangin High Court hian he thutlukna hi a siam a ni.

Rev. Lalmalsawma Sailo hian a sawi dan chuan Mizoram UPC lam hian building 14 (Biak In thenkhat telin) vel chu an demand ve leh niin ZALEN a hrilh a, mahse, nakin zelah, thil felfai taka a kal theih nan Kohhran leh pawl hrang hrang pawhin court thutlukna hi an zahna turin High Court thu-tlukna chu a dinna a nih tur thu a sawi.