Aizawl: Aizawl South I bialtu MLA C.Lalsawi vunga chuan, "Ka bial chhung atanga UPSC leh MPSC exam a inziaktling te chu an senso zawng zawng MLA fund atanga rulh let vek ka tum a ni," a ti.

Venghlui Branch YMA in nimina YMA day vawi 84-na, Aizawl Central hall-a an hmanna ah he thu hi sawiin MLA C.Lalsawivunga chuan, "Pawl thianghlim YMA kumpuan 'Ram leh Hnam humhalh' hi kan vawn nun tlat a ngai a, Zofate hmasawnna tur leh Zonunmawi vawng nung zel tur hian kan inthlahthlam thiang lo a. Kan ram chhungah ngei kan chep tial tial a, kan pun dan ratio te ngaihtuah chuan kan hnam hi kan thanharh loh chuan kan hmalam hun a thim hle a ni," a ti.

MLA chuan, "Kan ram leh hnam hi zirna leh thiamna, ruihhlo laka fihlim leh rinawmna, thawhrimna hmanga kan humhalh a ngai a. Hnam dangin zirna hmangin min chimral mek zel a, zirna hmangin kan ram hi kan humhalh thei a ni," a ti bawk.