Dan lova Canada atanga US luh tumte ruang pariat lai ramri-ah hmuh a ni a, pahnih chu naupang an ni a. Indian chhungkua an tel bawk

Police helicopter-in Zirtawpni khan St Lawrence River-ah ruang pahnih an hmu a, Romania leh India mi chhungkaw hnih an ni.

Thuneitute hian lawngleng khalhtu, kum 30 mi, Casey Oakes-a an zawnna lama an hmuh niin ani hi an la hmu lo.

Oakes-a leh chhungkaw hnihte hian inzawmna an nei em tih pawh an la hre lo.

Police chuan ruang hmasa ber hi Zirtawpni tlai dar 17:00 (India-a Inrinni zing dar 2:30) velah US-Canada ramri, Tsi Snaihne, Akwesasne, Mohawk territory-ah hmuh a ni.

Ruang dangte pawh an bul hnaiah hmuh zui an ni a. Tute nge an nih tak erawh an la hre lo.

Thite hi puitling paruk leh naupang pahnih an ni.

Naupang pakhat zawk hi kum thum pawh tla tling lo niin Canadian passport a nei a. Naupang pakhat zawk pawh hi Canadian khua leh tui niin tual chhung police chief chuan Zirtawpnia thuthar la khawmtute a kawmnaah a sawi.

Akwesasne Mohawk Police Service Deputy Chief Lee-Ann O’Brien chuan ruangte hi chhungkaw hnih, Romanian leh Indian nia hriat an nih thu a sawi.

“An zavai hian dan lova Canada atanga US luh tum niin kan hria,” tiin a sawi a. Nilaini zanah khan heng lai velah hian khaw awm dan a chiang lo hle niin a sawi bawk.

Ruangte hi Mohawk chen tamna, Montreal atanga Akwesasne-a Quebec huam chhunga hmuh an ni a. Mohawk-te hi Ontario, Quebec leh New York state-ah pawh an cheng a ni.

Canadian Prime Minister Justin Trudeau chuan, “Rilru a na tak zet,” a ti.

“Engnge thil thleng dik tak kan hriat a ngai a, engtiangin nge a thlen tih kan hriata a thlen tawh lohna tura hma kan lak nghal a ngai a ni,” a ti.

Canada atanga US-a dan lova luh tuma ramri kânte hi tun hnaiah hmun hrang hrangah an ruang chhar a ni zing ta hle.

January khan Canada-a police-te chuan  US-Canada ramri, Emerson, Manitoba-a vur tlakna lovah ruang pali an chhar a, pakhat hi nausen a ni nghe nghe a. Heng mite pawh hi India atanga kal tho nia an hriat thu US thuneituten an sawi.

December khan Montreal pa pakhat chu US-Canada ramri-ah tho aruang chhar a ni a. Kum 44 mi, Fritznel Richard-a hi US-a luha a nupui leh a fa zawm tur nia hriat a ni.

US border agent-te pawhin tun hnaiah Canada atanga an ram luh tum hi an pung nasa hle tih an sawi bawk.

January khan US Border Patrol chuan hmar lam atanga chhim lam rama luh tum mi 367 an man a, kum 12 liam ta chhunga ramri kân tum an man zawng zawng aiin an tam zawk a ni.