US chuan sipai lamah Ukraine chu $ tluklehdingawn 2.2 hu zet tanpuina a pek belh leh dawn tih a sawi a, heng zingah hian tuna a kah thei chin leta hla kap thei long-range missile pawh a pe tel dawn.

Tuna a pe leh tur nen hian Ukraine hnena February, 2022 hnu lama puihna a pek chu $ tluklehdingawn 29.3 hu zet a ni tawh ang.

Tun tuma a pek leh tur zingah hian ground-launched small-diameter bomb (GLSDB) an tih, km 150-a hla kap phak pawh a tel dawn a ni.

Heng hmanrua a pek thar tur hi Crimea kah nan a hmang ang tih hlauhthawnna awm mek chungchangah US thuneitute chuan chutiang atan a nih loh thu an sawi.

“Ukrainian-in beihpui thlakna tur a ruahmanna a, chu chu anmahni thutlukna siam a ni,” tiin Pentagon thupuangtu, Brig Gen Pat Ryder chuan thuthar lakhawmtute hnenah a sawi.

“Hmun hla zawk kap thei hmanruate hi an ram venhimna atan leh Russian-ten an an ram an luahsak chhuhsakna atana an hman tur a ni,” a ti.

Russia hian dan lovin kum 2014 atang khan Crimean Peninsula a luahsak tan a, tun hnaiah Ukrainian sipaiten an bei nasa hle.

Khawthlang ramte hian Ukraine hnenah hmanrua an pe nasa a; mahse, heng hmanruate hi Russia beih nan ni lo, a beitute laka inven nan chauh an hmang tiin an sawi nasa hle.

Ukrainian President Volodymyr Zelensky chuan US leh President Joe Biden hnenah puihna an pek leh tur avangin lawm thu a sawi.

“Kan kah pha hla tur hian kan sipaite chetna a nghawng dawn a, rawng taka Russia min nawrna hi a la reh ang,” a ti a. “US nen firfiakte lakah kan ding dun zel ang,” a ti.

Hmanraw tha zawk nen Kyiv

Ukraine-in hmanrua a neih mek zinga hmelma kap hla thei ber chu Himars rocket system a ni a, hei hian a tlangpuiin km 80-a hlaa mi vel thleng a kap phak a. Kyiv hian a hmang tangkai a, nikuma chhim leh khawchhak lama Russian an nawr kirna atana an hman kha a ni.

Tun tuma an dawn thar tur, GLSDB erawh tuna Russian-ten an awp lai hmun hrang hrang - Donbas, Zaporizhzhia leh Kherson region pawh kap phak vek tur niin Ukraine hian khawchhak lama Russian supply inpekna pawimawhte pawh a bitum thei tawh ang.

Boeing leh Saab ten an siam, GLSDB hi gliding rocket niin bomb lian vak lo a keng thei a, a bitum chu metre khat bial vel chhungah a fuh thei a ni.

Weapons system chi hrang hrang atanga kah chhah mai theih a ni a. Tuna Kyiv-in a hman mek, Himars leh M270 MLRS system atang pawhin awlsam taka kah chhuah mai theih a ni.

Hetih lai hian engtikah nge Kyiv-in a dawn dawn tih erawh Pentagon leh Boeing chuan an sawi duh lo ve ve a, mi thenkhat chuan Ukraine thleng tak tak tur chuan thla kua emaw lai pawh a la ngai dawn niin an sawi.