US leh Germany te chuan Russia doletna kawngah chak zawka Ukraine-in hma a lak theih nan tank tha chi pek an remti a, hei hian Russia a tithinur hle tura ngaih a ni. Russia chuan khawthlang ramte chu ramthuam hmanga Ukraine tanpui tawh lo tur leh an tilui a nih chuan a tuartu tur chu Ukraine a nih tur thu vauna a lo chhakchhuak tawh a ni.

US chuan Ukraine hi M1 Abram pek a tum a, a tlem berah tank 30 vel a pe dawn nia tarlan a ni. Hetih lai hian Germany pawhin an tank chhuanvawr Leopard 2 chu pek a tum a, a pek tur zat hi tarlan ni lo. German Chancellor Olaf Scholz chuan Leopard 2 hi 14 vel a thehchhuak dawn nia tarlan a ni a, hemi chungchang hi vawiin khan Parliament-ah an sawiho. 

US leh Germany ten Ukraine hnena tank pek an tum hi tun lai ramthuam hlauhawm ber zinga mi a ni a, hei hian an indona hmel hmang pawh a thlak theih mithiamte chuan an ring hial. Mahse Russia hi ramthuam nei tha tak a nih avangin Ukraine hian tank 200 vel tal chu a mamawh rin a ni a, hei hi a nei thei ang em hriat a ni lo. Ram thenkhat chuan Ukraine hi ralthuam hmanga tanpui zel an tum ruh hle bawk. 

Hetiang boruak karah hian US-a Russia ambassador chuan US leh Germany ten Ukraine hnena tank pek an remti hi na takin a sawisel a, boruak a sosang zual sawt a nih pawhin a mak lo ang.