US Open khelh mekah Casper Ruud chuan Karen Khachanov hnehin US Open mipa singles final a lut a, Frances Tiafoe hnehtu Carlos Alcaraz nen finalah an inhmachhawn ang. 

ATP tournament-a tum 9 zet champion tawh chunga Grand Slam title la hum ve miah lo Casper Ruud chuan harsa taka Karen Khachanov hnehin US Open mipa singles final a lut a, semi-final leh lamah best of five-a Frances Tiafoe hneh hramtu Carlos Alcaraz chuan final a lut ve bawk.  

Flushing Meadows, New York khawpuia khelh mek US Open chu zanin hian a tiak tawh dawn a, Norway mi Casper Ruud chuan Carlos Alcaraz  hmachhawnin a major title pakhatna tur a beisei ve thei dawn ta. Seeded pangana Ruud hian Khachanov-a chu 7-6 (7-5) 6-2 5-7 6-2 in mipa semi-final hmasa zawkah  a hneh. 

Semi-final leh lamah American beiseina Frances Tiafoe chu seeded pathumna Spanish tlangval Carlos Alcaraz-a’n 6(6)-7(8) 6-3 6-1 6(5)-7(7) 6-3 in a hneh ve bawk a ni. World ranking 4-na ni mek Alcaraz hian Ruud hneha a champion hlauh a nih chuan world no. 1 a ni chho bawk ang.

Chutih rualin, Ruud pawh hi ATP ranking lamah chuan hmun sang ber luah thei dinhmunah a ding ve mek bawk. Tunah hian Russia mi Daniil Medvedev chu number 1 ni mekin US Open-ah hian round li-naah a tla tawh a, kum 19 mi Alcaraz a hneh tak seeded 22-na Tiafoe hi Nadal lo vaw thla tawhtu kha a ni.

Thla thum liam taa khelh French Open final-ah khan Ruud hian khawvel-a Grand Slam title la hnem ber Spain mi Rafael Nadal a hmachhawn a, champion-na hun tha tak nei mah se a beiseina chu a thamral ta rih a, chu a beiseina chu rawn nung thar lehin zanin hian a tihlawhtling zo a ngem.

World number 7 hi clay court hmang thiam em em mai a ni a, tour title pakua a lak tawh zinga pariat chu clay court atanga a hlawh chhuah an ni. Kumin chhunga major tournament hnuhnung ber a lut thei hi Ruud pawn mak a tiin a lawm hle a ni.