United States Of America hi khawvel ram ropui tih takah an ram hruaitu luber thlanna pawh hi khawvel pum ngaihven a ni. America President nih chu Khawvel history a hming chuanna a ni e, an ti hial thin. A hun a lo thleng leh dawn ta tlem in thai lang ve teh ang. Kum 1792 atang khan kum 4 dan ah zel President hi an thlang thin. A hun pawh an duang fel khawp November ni 2 atanga ni 8 inkara thawhleh ni hmasa ber ah kher an thlang thin. Nakkum January ni 20 ah a tling chu President ah an la lut ang. An president candidate tur pawh an duh uluk na ngiang mai, America ram apiang ngei (Hollywood star Arnold te kha a in candidate thei lo, Austria rama piang a hnua US khualehtui ni chauh ania) kum 35 chin, chu tah pawh America rama kum 14 tal cheng ngei an ni tur a ni. Electoral College: America-ah hian mipuiten direct-in President leh Vice President an thlang ngai lo a. State tinah mipuiten an aiawha President thlang tur elector-te an thlang chhuak thin. Mipuite thlan elector chuan mipui aiawhin President leh Vice an thlang leh thin, hei vang hian mipuiten vote an thlak ve chu Popular vote tiin an sawi bawk thin. He kalphung (system) hi Electoral college an tih chu a ni. Tunah hian America ram chhung state 50 leh District of Columbia-a elector 3 nen electoral college-ah hian vote 538 a awm a. President tling tur chuan Electoral college vote 270 hmuh a ngai (538 chanve chu 269 a ni a, a chanve aia tam chiah 270 chin hmu chu tlinga puan an ni thin). America hi India ang maia ram lian a ni a, state pawh inlen hlei tak tak a awm hlawm. California state-ah mipui million 36 vel an awm a, elector pawh 55 lai an nei thei nghe nghe. State tinah Senator 2 an awm zel chu leh State district awm zat belh khawm chu elector an nei thin (entirnan: California state-ah chuan district 53 leh senator 2 an nei a tichuan electors 55 an nei thei ta. 53 dist.+ 2 senators=55). Chutih laiin North Carolina chuan district 13 chauh an nei a, senator 2 nen belhin elector 15 chauh an nei thei thung. State liana chak a pawimawh hle tihna a nih chu. Hei bakah hian America state pahnih Maine leh Nebraska-ah tih loh chuan Winner take all system an hmang vek a, state elector zawng zawng an hui vek thin (entirna: India ramah lo tehkhin ta ila, Assam state khuan elector emaw MP 20 president thlang thei nei se, Congress-in Assam-ah chuan MP/Elector 11 neiin hnenna chang se, Assam MP/Elector 20 kha a zavaiin anmahni lam President thlang turin a chang vek ang). Nomination Process: U.S. President ni tur hian rawtna (nomination) kalphung tlanglawn chi hnih a awm a: presidential primary election leh caucuses an tih mai hi state tinah an nei thin. Hei bakah hian party malin presidential nominating conventions an huaihawt thin bawk. He thil hi United States Constitution-ah chuang lo mah se political party-ten candidate-te thlitfimna hmanrua leh tih dan phunga an lo neih tawh a ni. Primary elections hi chu state leh local government ten an buaipui a, caucuses erawh hi chu party malin an buatsaih liau liau a ni thung. State thenkhatin primary elections chauh an nei a, thenkhatin caucuses chauh nei pawh an awm, chutih rual chuan a pahniha huaihawt kawp state pawh an awm tho thin bawk. Heng primary leh caucuses te hi dan tlangpuiin inthlan kum January leh June inkar federal election hma siin an nei thin. Technology leh media: Khawvel a thang chho zel a, radio leh Television hmuchhuah hnu phei chuan tunhma kum 1790 tawp lama an bul tan lai leh kum 1800 chho vel nen chuan Presidential campaign dan pawh a danglam nasa hle. TV lamah mahni infakna (commercial) lam tihchhuah an uar chho a, Lyndon B.Johnson-an kum 1964-a commercial “Daisy” te, Ronald Regan-a’n kum 1984-a ”Morning in America” leh George H.W.Bush-a’n kum 1988-a “Revolving Door” a siamte chu President an nih theihna tura chakna hnar leh nasa taka puitu an ni chho ta. Ronald Reagan phei hi chuan a khingpui, Walter Mondale chu electoral vote-ah 525-13 laiin kum 1984 khan a hneh a, President inbeih tawha inhnehna nasa ber a ni nghe nghe. Kum 1990 chho atangin internet a rawn inlar tan a, kum 1996 US president thlannaah chuan campaign hmanraw pakhat a ni chho tan; mahse, hemi kum hi chuan engtham mah nghawng a nei lovah an ngai. Kum 2000-a President candidate George W.Bush leh Al Gore te khan campaign Website an siam ve ve a, an enkawl ulukin an vil taima (update) reng. Kum 2004-a President chuh tumte phei chuan internet chu inthlan campaign-na hmanraw pawimawh takah an chan chho der tawh mai, chung zingah chuan Howard Dean-a campaign website chu a thain a entawntlak hle a, campaign nana thil tangkai ber pakhatah a tang chho va, amah thlawptuten a thusawi an en/chhiar zel theih bakah rawtna emaw, thurawn (feedback) emaw an siam thei a, anmahni anga duh thuhmun, hmun danga mite nen an inbepawp thei a, thawhlawm bakah awm hmun atangin internet kaltlangin campaign-ah an tel ve. Kum 2008 President thlan a’n nih leh meuh phei chuan Internet chu campaign-na atana kila lung pawimawh a ni ngawt tawh mai. Candidate-ten website an siam bakah social networking - facebook, myspace tih velah mipuiin tu zawk nge lar leh tha zawk tihte teh nan ber an hmang tan ta. Internet channel pakhat, Youtube-ah te candidate-ten an thusawi download theihten an dah bakah advertisement free-in an siam thei a, an tangkai pui ta hle mai. Kum 2010 November-a zirchiangtu pawl pahnih, Pew Internet & American Life Project leh Princeton Survey Research Associates ten an sawi dan phei chuan U.S.-a 54% puitlingten inthlan dawnah candidate-te chanchin leh an hriat duhte internet hmangin an en a, 26% ten twitter leh facebook leh social networking dang atangtein election chungchanga sawihona (discussion) an nei thin a, candidate-te chanchin hriatna hnar berah an lo hmang bawk tih a tarlang. March 26, 2006 khan Federal Election Commission chuan political communication Internet kaltlanga siam heng - emails, blogs leh websites siamte chu dan anga phuar tul a tih loh thu a pass nghe nghe. Thu belh: US President thlannaah hian Popular vote (mipui vote)-ah an khingpuite aia hmu tlem si; mahse, electoral college-a chak zawk avanga President ta 4 lai an awm. 1824-ah John Quincy Adams, 1876-ah Rutherford B.Hayes, 1888-ah Benjamin Harrison leh 2000-ah George W.Bush te an ni. Pafaa US President ni thei pahnih chiah an la awm, John Adam, President 3-na (1796) leh a fapa, John Quincy Adam President 10-na (1824) te leh George H.W.Bush, President 51-na (1988) leh a fapa, George W.Bush, President 53-na (2000) te an ni. US president zingah tlangval (kawppui nei lo) awm chhun chu James Buchanan, President 15-na kha a ni, a vahnu (unaute fanu) Harriet Lane chu First Lady ang deuhin a awmpui mai thin. US President reng reng hi Political background nei tha tak, senator tang lai emaw, ni tawh thin emaw, Governor hlui emaw, Secretary of State, Vice President hlui emaw, tang lai emaw an ni deuh zel. Chutiang ni miah lo an thlan hnuhnung ber chu kum 1952-a thlan (World War II hero) General Dwight D.Eisenhower kha a ni. U.S. Secretary of State hi President ni tura kailawn (stepping-stone) a ni thin. Tunhma kum 1801 leh 1841 inkara President 6 zinga 5 zet kha Secretary of State an ni a; mahse, 1841-a Secretary of State James Buchanan, President a nih hnuah tumah Secretary of State hi President an ni leh tawh lo.