V. Lalnunthara (Mathara)
E-43, V. Thanga Street,

Dawrpui United States of America, Hindi-a ‘Amrika’ tia ngaina taka kan lam thin President 46-na ni tur, Pu Joe Biden-a hi a hming pum Joseph Robinette Biden Junior a ni a. Kum 1942, Ni 20 November khan Pu Joseph Robinette Biden Senior leh Pi Catherine Eugenia Jean Biden te fa hmingkoh niin Scranton, Pennsylvania a St. Mary’s Hospital-ah a lo piang a. An unau hi 4 niin, farnu 1 a nei. An chhungkua hi Roman Catholic nghet tak an ni. A nu leh pa hi kum 80 chuang ve ve damin, tunah chuan thlarau chawlhna hmunah an chawl tawh a ni. Thlahtu bul chhuinaah chuan, a pa lama a pute hi an awm thei tia sawi tur an ni ve a, tuialhthei sumdawnna an kalpui thin. Pu Joe Biden-a pa pawh hi chhungkaw chawmin harsa lem lo takin bul tan mah se Pu Joe Biden-a pian lai vel hi sumdawnna lama a pachhiat lai tak nen innang chhoin, a nu lama a pute hnen lamah kum tam tak chu an khawsa chho ta a ni. Kum 1953 a lo herchhuah chuan, Delaware state-ah an pem a, a pa hian eizawnna bul tan tha lehin, lirthei hman hlui hralh chhuah lehna sumdawnna chu an chhungkua chuan kalpuiin, chhungkaw khawsak thu-ah pawh bakberh lutuka awm lovin, vantlangah chhungkuaa a rualpawl tawk a awmin an khawsa chho ta a ni.

Joe Biden-a chu lo thanglian ve zelin, high school hial a lo rap chho ve ta a. Claymont, Delaware-ah hian kum 1932-a Roman Catholic ten an din, Archemere Academy-ah lut chhoin, he sikul hian kum tin naupang 500 aia tam lo an la lut thin a. Kohhran zirna in, Wilmington Diocese ten an enkawl a ni. Rawlthar infiam nuam tirual ni chho ta chu an school, high school football team-ah hial a tel pha ve a, football piah lamah chuan baseball a ngaina hle bawk a ni. Joe Biden-a hi mahni rualpuite zingah awm dan a thiamin, an zinga hruaitu taka en a hlawh chho a, high school leh senior high a kal chhung zawng hian Class President a ni tluan chhuak zak a ni. Kum 1965 khan University of Delaware atangin B.A a zo a, History leh Political Science-ah double degree neiin, English chu minor subject-ah a la bawk a ni. B.A-ah hian zirlai mi 688 zingah 506-na niin ‘C’ grade-ah a pass a ni. Rawlthar a nih chhoh lai hian hriselna kawngah harsatna a tawk ve a, hun eng emaw lai chen chu dangawk kan tih mai, tawng lama harsatna a nei hman a. Amaherawhchu, ama sawi danin, darthlalang hmaah hemi a reh theih nan hian hla thu chham a ti fo thin a, a reh zui ta mai niin a sawi a ni.

Kum 1966, Ni 27 August khan Syracuse University atanga a tawn, a hmel duh, Neilia Hunter-i nen New York Roman Catholic-ah an inkutsuih a. Catholic mi ngei nupui nei turin, a nu leh pain an duhpui viau nain, a hmangaih tak, an kohhran pawn lam mi a neih chu an remtihsak ta hlauh a. Fanau malsawmna an dawng a, fa 3 an nei a. Chungte chu Joseph R. Beau Biden-a III, Robert Hunter Biden-a leh Naomi Christina Amy Biden-i te an ni. Kum 1968 khan Biden-a hian Syracuse University College of Law atangin LL.B a zo va, zirlai 85 zingah 76-na a ni a, Delaware bar council-ah a kum lehah lak luh a ni. Asthma a neih avangin, sipai a, lut ve lo va, ngaihnathiam a ni. Dan hremi a nih angin, dan lam chu a khawih chho a, hetih lai mek hian kum 1969 khan Delaware-a New Castle County-ah Council Member atan thlan tlin a ni a. Hei hi tualchhung politics-a a inhnim phim chhoh tan takna chu a ni. Kum 1972 khan an khua Delaware atangin junior U.S Senator atan thlan tlin a ni a. Hemi tum hian Republican party mi, bialtu ni lai, J. Caleb Boggs-a chu a hneh a, Democrats atangin Joe Biden hi he biala chuh ngam awmchhun a ni nghe nghe. Hemi tuma a campaign hian in uh chhuah tak meuh meuhin a chhungte tanpuinain campaign rusum an thlak a, hemi tuma a campaign auhlaah chuan mipui vantlang zingah dam mawh hritlan nikhuaaa an inenkawlna lam kawnga puihna lam leh mihring dikna leh chanvo humhalh kawnga hmalak bakah mipuiten politics kalphung hlui an lo hne tawh chu kalphung thara thlakte a tel a. Vote za zelah 50.5 hmuin, thlan tlin a ni.

Joe Biden hian hringnun tungchhoah hian harsatna hrang hrangin a tlakbuak ve nasa hle a. Chung harsatna chhum dum chhah tak takte chu patling taka a hmachhawn a tul si. Senate-ah thlan tlin a nih hnu reilo teah, hemi kum vek, Ni 18 December-ah chuan a nupui leh a fate 3 chu Masi bazar tura an kal chu lirthei dang nen intaiin, an chesual a. Damdawi inah hian a nupui leh a fanu, Naomi te chu an boral nghal a, a fapate 2 pawh an dam chhuah beiseina a tlem hle tih hrilh hriat a ni a. Hemi tuma a manganna leh hreawm a tihzia hi tun tuma president thlana campaign laiin, vawi duai lo a sawi chhuak nghe nghe a ni. An chhungkaw chunga vanduaina thleng avang hian Joe Biden chu a inngaihtuah nasa hle mai a, Senate-ah thlan hlim a ni hlawt a, a kawng lo tur a zawh em ni dawn tih thlengin a dawn ni tur a ni, a fate enkawl tura bansan mai a tintuah ta a. Amaherawhchu, Senate-a majority Leader Mike Mansfield-a chuan Joe Biden-a theihna hi a lo hmu thiam hle ni tur a ni, bâng lo turin a hmin thei ta hram a ni. Kum 1973-ah lo inherchhuah chuan, kum 30 mi niin, U.S chanchinah Senator dinhmun luah thei zingah kum lama naupang lama chhiara 6-na a ni thei a ni. Senate-a thlan a nih hnu hian Washington D.C-ah a awm ta a. Kum 36 chhung Senate a nih chhung hian Delaware-a a fate tlawh turin ni tin Washington D.C-ah hian relin a kal thin a, rel hian darkar khat leh a chanve a hla a ni. Chhungkaw tana pa nih tling tak a ni. An chhungkaw chunga vanduaina thleng hi patling tan pawh lungdam taka pawm mai chu a harsa hle ang. Heng avang hian amahah thinrimna leh lungawi lohna a intuh thuai a, Pathian remruat dan chu pawm mai a harsa a ti a, chu chuan a hna lam thleng pawhin harsatna rei tak chhung chu a siam nghe nghe a ni. Hetia politics leh nun ipik tak ata a rawn chhuah lehnaah hian, a nupui hnuhnung, school zirtirtu, Jill Tracy Jacobs-i, tun hnua Jill Biden-i ni ta, chu a nunah a pawimawh hle a. Kum 1975-ah inhmelhriatin, kum 1977 khan an innei a. Fanu pakhat, Ashley-i an nei a, social worker a ni. A fapa, Beau Biden-a chu U.S Army Judge Advocate niin Iraq indonaah khan a tel a, a hnuah Delaware Attorney General-ah a kaisang. Vanduaithlak takin kum 2015 khan thluak cancer avangin a thi a. A fapa tho, Hunter Biden-a chu Washington attorney-in a awm mek a ni.

Senate nia rawng a bawl chhung hian thil thleng tam takah awka a nei thin a. Kum 1993 khan Joe Biden khan neih inang inkawp chu sipai nun nen a inmil lo tiin, neih inang inkawpte chu sipaia tel zui lo turin dan an siamah a thlawp zawngin a lo vote tawh a. Kum 1996 khan Defense of Marriage Act thlawp zawngin a lo vote tawh a. He dan hian US state-te chu neih inang inneihna pawm lo turin a ti a ni. Kum 2015 khan neih inang inkawpte chu zalenna zau zawk pein, hemi chungchang hi thiah a ni thung a ni. Joe Biden hian US President nih hi a lo tum fo tawh thin a. Kum 1987 khan a kum leh, 1988-a US President thlanna lo awm tur atan Democrats candidate ni turin a bei a, amaherawh chu chhan hrang hrang avangin a inhnukdawk ta a ni. Kum 2007 khan a kum leh 2008 a President thlanna lo awm tur chu chuh leh tumin a bei na a, beisei anga thlawptu a hmuh that loh avangin a inhnukdawk leh ta thuai a. A tan hun tha rawn inherchhuak lehin kum 2008 khan Barrack Obama chuan Vice President atan a duh thu a puang a. Hemi kum US Inthlanah tlingin, Vice President atan thlan a ni ta a ni. Kum 2013 atanga 2017 chhung khan Vice President atan thlan nawn leh a ni a. President Barrack Obama nen hian an inthlawp tha hle a ni. Heng hun chhung hian Osama Bin Laden-a luhchhuahna kha a thleng nghe nghe a ni. Kum 2019 April ni 25 khan Democrats atanga US President thlanna chuh turin a campaign tan a. Democrats party candidate chang tura theihtawpa a beih hnuah leh a khingpui Bernie Sanders a inhnuhdawh hnuin, Democratic National Convention chuan kumin August ni 18 hian an party candidate atan an puang fel ta a ni. Carolina Governor ni lai, Kamala Harris chu an party Vice President atan puan a ni bawk.

US hian an ram President thlanna hi Ni 3 November khan an nei a, COVID 19 avangin dak kaltlanga vote tlate chhiar chhung a rei em avangin, mipuiten tu zawk nge chak ang tih an thlir thup laiin, Ni 7 November, India sanaa zan dar 10:00 a lo rik chuan, President ni tura electoral college 538 atanga chak tura vote hmuh ngai 270 chu a hmu tling ta a. US President 46-na atan thlan tlin a ni ta a ni. A khingpui, President nilai Pu Donald Trump-a chu kum 1992-a George H.W Bush-a hnua term 2 dang chelh leh lova tling zo lo hmasa ber a ni ta a ni. Ruahman lawk anga thil a kal tluang a nih chuan Joe Biden hi nakum January ni 20 chhunah America President atan rinawmna thu tiamtira lakluh a ni dawn a. Lakluh a nih hunah hian kum 78 a lo ni tawh ang a, America-in President a neih tawh zawng zawng zingah a upa ber a ni dawn ta a, Delaware state atanga President ni thei hmasa ber a ni dawn bawk a ni.

Chawimawina tam tak a dawn zingah kum 2017 khan Barrack Obama kut atangin America civil mite chawimawina sang ber, Presidential Medal of Freedom a dawng a. Amah hi lehkhabu ziak mi niin, lehkhabu 10 chuang a tichhuak tawh a. Nun danphung hrisel tak a zawm a. Amah hi zuk leh hmuam leh ruihtheih thil dang khawih lo a ni a, zu pawh a in lo va, tum khat chu zu a in loh chhan an zawh chuan, ‘An chhungkuaah zu in an tam tawk tawh a, a mamawh ve lo,’ tiin a zu in loh chhan hi a sawi nghe nghe a ni. America ram ropui tak, Pathian duh dana a kaihhruai theih nan finna dilsakin duhsakna i hlan ang u.