Aizawl March 22, 2022: National Tobacco Control Programme, National Health Mission: Mizoram  chuan vawiin khan Workshop cum consultative meeting on Global Youth Tobacco Survey-4 & Tobacco Free Education Institutions chungchang zirhona MJA member-te tan Aizawl Press club-ah an buatsaih.

Zirhona hi Dr. H.Lianthangpuia, State Nodal Officer, NTCP cum Joint Director in a kaihruaia a,  Global Youth Tobacco Survey-4 & Tobacco Free Educational Institution  (ToFEI) chuangchang ah  R. Lalremruata, State Consultant NTCP chuan presentation neiin zawhna leh chhanna hun hman a ni. 

Special Guest Dr. Eric Zomawia, Mission Director, NHM chuan WHO chuan vaihlo chu vantlang hriselna atana thil hlauhawm bera chhiar a nih thu sawiin, hmeichhia ah meizu an pung chu pawi a tih thu leh vaihlo chu naupang-ah a that loh zia tun aia uar taka inzirtir a tul thu a sawi a, ram changkang apiang ah vaihlo hmanna chu a tlak hniam thu a sawi bawk.

MJA President Zonunsanga Khiangte pawhin, Vaihlo leh a kaihhnawih chungchang zirhona National Tobacco Control Programme-in a buatsaih thin chu lawmawm a tih thu a sawi a. Thawhhona tha tak MJA nen an neih chu chhunzawm zel tha a tih thu leh tangkaina an nei anih chuan an inhawn reng thu a sawi. 

National Tobacco Control Programme hruaitute chuan  zawhna chhangin vaihlo sim duh te tan National Quit Line a awm angin State Quit Line siam chu an rilrua a awm thu an sawi a, thahnem ngai taka MJA te chu thawhpui ah sawmin, local film leh local music video a vaihlo lanna chu uluk leh zuala endik a tul thu an sawi bawk.